FISECA sa Talisay wala’y gihimo batok illegal fishers

CEBU, Philippines - Mga mananagat miduso og reklamo kagahapon sa buntag ngadto kang Konsehal Antonio Bacaltos, Jr.  ug Konsehal Doroteo Emit batok sa hepe karon sa Fishermen Sea and Ecological Care (FISECA).

Si Bacaltos maoy chairman sa committee on environment sa konseho sa dakbayan sa Talisay samtang si Emit sakop sa maong komitiba. Si Alfreda Cabusas, presidente sa Fisher Folks Association Inc. mipasangil kang Arturo “Jun” Aras, hepe karon sa FISECA,  nga walay gihimong aksiyon kabahin sa ilegal nga panagat diha sa Talisay.

Gibutyag ni Cabusas nga sa padayong ilegal nga panagat sama sa pagpaniro og dinamita nabalaka silang maapektohan ang gihatag nga proyekto sa Bureau of Fisheries and Aquatic Resources (BFAR) nga Bangus fish cage nga nahimutang diha sa headquarter sa FISECA diha sa barangay Cansojong.

Matud ni Cabusas nga giingong halos kada adlaw dunay mga maniro og dinamita apan giingong wala’y gihimong aksiyon niini ang hepe karon sa FISECA. Dugang ni Cabusas nga miduol sila sa mga  nahisgutang konsehal aron sila matabangan sa ilang problema.

Si Bacaltos ug Emit sa ilang bahin nagkanayon nga mopahigayon sila og imbestigasyon sa maong report.

Matud sa duha ka konsehal nga kung padayon ang pagpahigayon sa ilegal nga panagat diha sa kadagatan sa Talisay moabot ang panahon nga ang mosunod nga henerasyon mahimong makaluluoy tungod kay wala na unya kini makuhang isda.

Gibutyag ni Bacaltos nga ang maong reklamo nga nadawat niya dili lang mao ang unang reklamo ug kinahanglan na kining himoan og aksiyon.

Si Emit nagkanayon usab kini nga human sa ilang himuong imbestigasyon posibleng mopalabang sila og balaodnon ngadto sa konseho kabahin sa maong problema.

Si Aras sa iyang bahin, mihimakak sa mga pasangil  batok kaniya ug nagkanayon nga 11 na ka mga tawo ang ilang nasikop tungod sa ilegal nga panagat nga liba-liba ug trawl. Si Aras nga unom ka buwan pang milingkod isip hepe sa FISECA miingon nga unom lang sa ilang dinakpan ang ilang na-turnover ngadto sa mayor tungod kay ang uban ilahang gipasaylo.

Matud ni Aras nga ang mga masikop nilang illegal fisher embargohan sa ilang mga ekipo sa panagat unya pabayron og multa.

Kabahin sa pagpaniro og dinamita,  matud ni Aras nga bantayan lang sila sa mga manirohay kung molakaw sila aron mokuha sa ilang supply sa gasolina ngadto sa city hall.

Gawas niini ang mga manirohay og dinamita dali kaayong mosibat kung duna nay magpadulong nga mga sakop sa FISECA. Dugang ni Aras nga natahap siya nga dunay bulok politika ang maong reklamo batok kaniya. (BANAT NEWS)