Lalaki nakuhaan og high-powered firearms

CEBU, Philippines -  Usa ka lalaki nga nagdala og high-powered firearms ang gidakop sa kapolisan human dunay mga tawong nakabantay sa migimaw nga rifle butt sa gidala niining dakong bag diha sa dalan Palma sa dakbayan sa Sugbo sa alas 6:30 sa milabay’ng gabii.

Ang gidakop mao si Ronald Mancao Miramontes, 31, residente sa maong lugar kinsa wala makapresentar og mga dokumento sa dihang gipangitaan sa mga polis tungod sa pagdala niini sa maong mga armas. Matud pa nga nakit-an si Miramontes nga nagdala og green nga plastic bag apan migimaw ang rifle butt sa plastic bag hinungdan nga dunay concerned citizen nga misumbong sa kapolisan.

Ang mga sakop sa Investigation and Detection Management Branch sa dakbayan sa Sugbo pinangulohan ni SPO2 Francisco Ortiz miresponde sa maong lugar ug ilang nasigpatan ang suspek nga duna gyu’y gibitbit nga green bag nga may migimaw nga rifle butt.

Daling gisikop ang suspetsado ug sa pagsukit-sukit nasuta nga usa ka KG-9 submachine pistol nga dunay usa ka magazine ug usa ka Colt AR-15 assault rifle nga dunay usa ka magazine sa 9mm  ang sud sa green bag.

Apan walay napresentar nga papeles alang sa legal nga paghupot niini sa maong mga armas si Miramontes hinungdan nga kini gisikop ug gikatakdang pasakaan og kasong illegal possession of firearms. (BANAT NEWS)