Wa mohatag og P2 gipusil

CEBU, Philippines - Gipusil ang usa ka habal-habal drayber human mibalibad og hatag og dos pesos sa usa ka lalaki sa sitio Mayupay barangay Quiot dakbayan sa Sugbo pasado alas 3:00 sa kaadlawon kagahapon. Ang biktima nailhan nga si Jose Cleofard Cadungog Daño, 45, minyo, molupyo sa sitio San Roque dakbayan sa Sugbo.

Samtang ang suspetsado nailhan ra sa pangalan nga “Arning”, 22, molupyo sa sitio Mayupay, barangay Quiot nga padayon pang gipangita.

Base sa imbestigasyon nga gihimo nila ni SPO4 Rey Cuyos, PO3 Lou Pagara ug PO2 Nilo Aventurado sa Homicide Section sa Cebu City Police Office miingon nga ang biktima nagpaabot og pasahero sa naasoy’ng lugar sa dihang miabot ang suspetsado ug nangayo og dos pesos. Apan wala kini tagai sa biktima mao nga nilakaw ang suspetado nga naglagot. Pipila ka minuto ang milabay, mibalik ang suspetsado nga nagdala na og pusil ug gidiretso pagpusil ang biktima apan nakadagan bisan naigo na sa walang paa apan gigukod kini sa suspek ug giusban og pusil apan wala na makaigo.

Si Pagara nahinabi sa The Freeman/Banat News miingon nga kaila ang biktima ug ang suspetsado ug posibleng nasuko ang suspek nga wala hatagi og kwarta. Ang biktima gidala sa Cebu City Medical Center.  (BANAT NEWS)