Bus pasaheroan natagak sa skywaY, 21 patay

CEBU, Philippines - Patay ang 21 ka pasahero  ug daghan ang grabeng nangaangol  dihang bus nga ilang giluwanan kalit lang natagak sa skyway nga nahimutang sa Bicutan didto sa kaulohan kagahapon sa buntag.

Kini base  sa report sa  GMANews.tv nga nag-ingon nga ang Don Mariano bus nagdagan  paingon sa Pacita Complex, Laguna  apan kalit lamang kining natagak sa wala pa mahibaw-ing hinungdan.

Gumikan sa maong aksidente ang Land Transportation Franchising and  Regulatory Board misuspenso gilayon sa 78 ka bus units sa Don Mariano Transit samtang ang drayber sa maong bus nga sakyanan  ang gimandoan usab sa pagpaubos sa drug test.

Samtang sa report usab sa ANC, si LTFRB Chairman Winston Ginez miingon iyang gitawgan ang tag-iya sa maong sakyanan nga bulontaryo sa pagpa-recall sa ilang mga sakyanan bisan kun wala kini makadawat og written order alang sa pagsuspenso sa biyahe sa tanan niining bus pasaheroan.

Matud pa ni Gines nga gawas nga magsugod gilayon sa pag-epekto ang 30 ka adlaw  ipaubos usab sa road worthiness inspection ang 78 ka mga units niini sa motor vehicle inspection ug ipaubos usab sa seminar ug drug test ang tanan nga mga drayber niini.

Samtang ang drayber sa naaksidente nga sakyanan gawas nga ipaubos sa drug test  iyang gimando ang pagpaubos usab sa alcohol testing. (BANAT NEWS)