Calamity loan applications nagsugwak— Pag-Ibig

CEBU, Philippines - Mikabat  og 24,449  ang mga  calamity  loan  application  nga  nadawat  sa  mga  buhatan   sa Pag-Ibig  Funds,  sumala  ni  Vice  President  for  the Visayas  Victoria dela Peña sa  Pag-Ibig  Fund. Matud  pa  ni  dela Peña  nga   kining  maong  gidaghanon  nagsukad  lang  sa Oktubre 16 hangtud  niadtong  Disyembre 10, 2013  ug  nadawat  sa  mga  buhatan  sa Pag-Ibig  sa  tulo  ka  rehiyon  sa  Visayas.

Sa maong  gidugayon  mikabat  og 21,450  ka  aplikasyon  ang  nabayran    sa kantidad  nga P199.647 milyones  sumala  ni  dela  Peña.

Miingon  siya  nga ang  mga katalagman  nga  nasugamakan  sa  mga  molupyo  sa Kabisay-an  nakapasugwak  sa  mga loan  application  nga  nadawat  sa buhatan  sa Pag-Ibig Funds.

Sa miaging  Oktubre 15,  nasugamak  ang  Sugbo  ug  Bohol  sa 7.2 magnitude  nga  linog. Nianang  pagkaugma  o  Oktubre  16,  nagsugod  dayon  pagsang-at  og  calamity loan  application  ang  mga  miyembro  sa  Pag-Ibig.

Apan  misamot  ang  pagdagsang  sa  aplikasyon  dihang  midasmag  ang   bagyong  Yolanda  niadtong  Nobiyembre  8,  nga miigo  sa amihanang  bahin  sa lalawigan  sa Sugbo,  mga dakbayan  sa  Tacloban  ug  Ormoc  ug  uban  pang  bahin  sa lalawigan  sa Leyte,  mga  lungsod  sa lalawigan  sa Samar  ug  sa  Iloilo.

Hinuon  matud pa  ni  dela  Peña  nga  dili  sila mohunong  sa pagpanawat  og calamity  loan  applications  tungod  kay  nasabtan  nila  ang  panginahanglan  sa tanang  miyembro  sa  Pag-Ibig.

Gani  may  mga  aplikanti  og  loan  nga    gagmay  na lang  og  nadawat  kay  gitibhangan  man  sa ilang unang  utang  ang  bag-o  nilang  gi-loan. Ang  uban  gigamit  sa pagpaayo  sa ilang  mga  balay  nga  naguba  sa  linog  ug  sa bagyo .

Busa  bisan  ang  mga  kawani  sa Pag-Ibig  mihalad  usab  sa ilang  sakripisyo  sa  pag-atiman  sa panginahanglan  sa  mga  miyembro  sa  Pag-Ibig,  sumala  ni  dela Peña. (BANAT NEWS)