100 mil ka putos nga hinabang nadawat sa taga amihanan

CEBU, Philippines - Dul-an sa 100,000 ka pinutos nga  pagkaon ang gipang-apud-apod sa Department of Social Welfare and Development sa Central Visayas (DSWd-7) sa mga dapit  nga apektado sa bagyong Yolanda.

Sumala pa ni Kerwin Macopia,  tigpamaba sa DSWD-7 nga ang kadaghanan sa  mga  nakadawat  niini  mga  molupyo  sa   amihanang bahin sa Sugbo.

Nasuta  nga  ang  mga  balay  ug  mga  kabtangan sa  mga molupyo  sa maong  mga  lugar   nasugamak  sa dakong  kadaot resulta  kakusog  sa maong  bagyo.

Gumikan  niini  gipadayon sa    DSWD  ang pagpanghatag  og  mga  pinutos  nga hinabang sa  amihanang  bahin  sa Sugbo  tungod  kay  padayong  nangayo  ang  mga  local  nga  opisyal  sa kagamhanan sa  maong  mga  lugar, matud pa  ni DSWD-7 Regional Director Mercedita Jabagat.

Gipadayag ni Jabagat nga ang ilang buhatan mipadala usab og mga relief goods ngadto sa lungsod sa Bantayan, Borbon, Carmen, Catmon, Consolacion, Daanbantayan, Madridejos, Medellin, Pilar, Poro, San Francisco, San Remigio, Santa Fe, Sogod, Tabogon, Tabuelan, Tudela ug lakip na sa mga siyudad sa Bogo, Cebu, Mandaue ug Talisay.

Gawas  sa  mga  pinutos  nga  pagkaon,  mipadala  usab  ang  DSWD  og  mga  used clothing,  sumala  pa  ni  Jabagat.

Gibutyag ni Jabagat nga ang ilang buhatan dili gayud mohunong sa ilang pagpanghatag  og relief goods  niining bulan sa Disyembre ning tuiga.  (BANAT NEWS)