9 mananagat nasikop sa Bantayan

CEBU, Philippines - Mikabat  sa siyam ka mananagat  ang  nasikop sa kapolisan samtang  nanagat   sa kadagatan  sa barangay  Lipayran, lungsod  sa Bantayan, pasado alas 4:00 sa miaging kaadlawon.

Ang mga nasikop mao sila si Larry Marfa, 39, minyo, kapitan sa panagatan, Herbert Enriquez, 41, machine operator, ug ang tripulante sa fishing  boat nga sila Angelito Abrasaldo, 40, minyo, Alemar Sinugbuhan, 21, Jimmy Espinosa, 24, Allan Ornido Jr, 25, Rowel Lotrago, 22, Nestobon Espinosa, 24, Antonio Espinosa, 28, nga pulos molupyo sa dakbayan sa Sagay sa lalawigan sa Negros Occidental. Matud pa sa spot report sa Cebu City Police Office nga nasigpatan sa  mga otoridad  ang  F/B Glory of the Sea nga gipanag-iya ni Johnry Espinosa nga misulod sa kadagatan sa Bantayan ug illegal nga nanagat sa maong lugar.

Base  sa ordinansa  sa lungsod, ang mga commercial fishing boats gidid-an sa pagpanagat sa kadagatan sa maong lungsod .

Busa milihok  dayon  ang  mga  polis  nga  sila si PO2 Joel Illustrisimo, PO1 Florante Desucatan ug PO1 Villaceran,  uban  sa usa  ka  opisyal sa Department  of Agriculture sa lungsod  ug  gisikop  ang mga suspetsado.

Nasakmit sa kapolisan   ang 20 ka banyera sa isda nga mobalor og P30 mil.

Kasamtangang natanggong sa karsel sa Bantayan Police Station ang mga mananagat, samtang giandam pa ang kaso nga ipasaka batok kanila. (/WC)(BANAT NEWS)