200 ka balay naugdaw!

CEBU, Philippines - Naugdaw ang gibanabanang 200 ka mga balay ug usa ka milyon ang danyos sa sunog nga miigo sa duha ka sitio sa Barangay Carreta ug usa ka sitio sa barangay Tejero sa dakbayan sa Sugbo pasado alas 3:00 kagahapon sa hapon.

Si Kapitan Edgar Lauron, sa barangay Carreta sa report kagahapon mibana-banang 200 gyud ka balay ang naugdaw sa iyang dapit.

Samtang ang imbestigador sa Bureau of Fire Protection sa dakbayan sa Sugbo, Chief Insp. Rogelio Bongabong Jr. nga nahinabi sa Banat News atol sa nagpadayong clearing operations miingon nga usa ka gatos ka mga balay ang hingpit nga naugdaw wala pay labot sa mga partially burned.

Sumala pa ni Bongabong  nga nadawat nila ang alarma sa alas 3:26 sa hapon  ug giisa sa Task Force Bravo ang maong sunog hinungdan nga miresponde ang kabomberohan sa dakbayan sa Talisay ug sa lungsod sa Liloan.

 Gideklarar nga under control ang maong sunog paglabay sa usa ka oras sumala pa ni Bongabong.

Ang kapitan sa barangay Careta nga si Lauron nga nahinabi sa Banat News miingon nga nahurot na ang calamity fund sa ilang barangay ug nagsalig lang usa siya sa tabang nga ihatag sa kagamhanan sa dakbayan karon.

Ang mga nasunogan naghuot karon sa gamay nga gym sa barangay Carreta.

Matud ni Vice-Mayor Edgar Labella nga buot niya nga i-deklarar sa konseho sa Carreta nga ubos sa state of calamity ang maong barangay aron matabangan sila sa siyudad. Gisugyot usab ni Labella nga mapaubos sa reblocking ang lugar tungod kay fire prone area ang dapit.

Usa sa problemang nasinati sa kabomberohan mao ang kawalay access road pasud sa nasunogan maong sa Gen. Maxilom Avenue Extension ra nagtapok ang mga fire trucks.

Gitino pa sa imbestigador ang hinungdan sa maong sunog apan ang mga residente miingon nga dunay mga bata nga nagduwa og pabuto sa bakery sa mga Barda nga maoy posibleng hinungdan sa maong sunog.

Apan si Kapitan Lauron sa iyang bahin nagduda nga illegal tapping sa kuryente ang hinungdan sa maong sunog sanglit mao kini gipanghimo sa maong lugar.

Sumala pa ni Bongabong nga duha ka mga tawo ang nangasamad sa maong sunog. Samtang si Chief Insp. Weldemar Tiu sa Waterfront Police Station mibutyag nga dunay duha ka mga lalaki ang nadakpan tungod sa pagpangawat og aircondition unit sa usa sa mga nasunogan. (BANAT NEWS)