Botika gitulis sa duha

CEBU, Philippines - Gitulis sa duha ka mga lalaki nga nag-helmet ang usa ka pharmacy sa Nasipit, Talamban ning dakbayan sa Sugbu ug gisakiyo  ang P80 mil nga kinitaan niini alas 2:50 sa miaging hapon.

Duha ka mga lalaking nagsuot og crash helmets ang misulod sa Rose Pharmacy ug mipahapa sa gwardiya nga padung pa mag-ilis sa iyang uniporme nga si Norberto Villahermosa Carreon.Sumala pa ni PO2 Roger Castillo nga misulod sa pharmacy ang duha ka mga tulisan nga gihulagway nga ang usa may gitas-on nga 5’6” ug nagsul-ob og helmet ug orange nga sinina nga nagbitbit sa wala pa matino nga armas. Samtang ang usa sa mga tulisan gihulagway lang nga tambokon ug 5’7” ang gitas-on nga nagsuot og itom nga jacket, nag shorts og puti unya nag-helmet sab.Matud pa ni Castillo duna nay mga empleyado sa sud apan diha sa blotter bugtong ang assistant pharmacist lang nga si Jennifer Rota Erana, 28, ug ang gwardiya nga si Carreon ang gipanganlang mga empleyado.Sumala pa ni Castillano nga si Erana ug ang security guard nga si Carreon padulong pa motrabaho ug didto pa kini sa dressing room ug gisulod kini sa usa sa mga tulisan ug gipahapa.

Giingong nagpakaaron-ingnong mga customer ang duha ug kalit  nga mideklarar og tulis dungan sa pagmando nga ipagawas ang ilang halin, apan dihang gitunol na kini, mireklamo pa ang mga tulisan ug midemanda nga pabuksan ang cash vault.Nakuha gyud sa mga tulisan ang cash nga mobalor og P80 mil unya dali kining misibat paggawas sa pharmacy.Matud pa ni Castillo nga wala na makit-i sa mga empleyado kun asa padulong ang duha ka mga tulisan tungod kay mikaging kini sa kahadlok.Padayon pa ang imbestigasyon nga gihimo sa kapolisan sa Station 8 sa maong pagpanulis, nasuta usab nga walay close-circuit television camera (CCTV).  (BANAT NEWS)