Sertipiko ihatag sa civil service karon

CEBU, Philippines - Ang Civil Service Commission sa Central Visayas (CSC-7) motunol sa certificates of eligibility ngadto sa bag-ong civil service eligibles karong adlawa didto sa CSC-7 Multi - Purpose Hall sa Sudlon, Lahug dakbayan sa Sugbo.  

Matud pa ni CSC-7 Regional Director Karin Litz Zerna nga ang mga mipasar sa CS Professional Exam kinsa mikuha sa maong eksaminasyon didto sa University of Cebu kansang  ngalan nagsugod sa letrang A hangtod M hatagan sa maong sertipiko karong alas 8:00 ang takna sa buntag.

Dugang pa ni Zerna nga ang mga nakapasar sa CS Professional nga mikuha sa maong eksaminasyon didto sa  sa UC kansang mga ngalan nagsugod sa letrang N hangtod Z ,ingon  man  sa  mga nakapasar nga mikuha sa  eksamin  didto sa Cebu Normal University ug ang mga nakapasar sa CS Sub-Professional didto sa Abellana National School  modawat  sa certificate of eligibility sa ala 1:00 ang takna karong hapon.

Si Zerna nagkanayon nga ang tanang mipasar sa maong eksaminasyon kinahanglang magdala sa ilang balidong identification card nga adunay hulagway nila ug usab pirma.

Magdala usab sila og duha ka passport size nga hulagway nga adunay pirma ibabaw sa ilang name-tag sama sa retrato nga ilang gipapilit sa application form sa pagkuha nila sa eksamin.

Gibutyag ni Zerna nga kadtong adunay mga pangutana kalabot niini mahimong motawag ngadto sa Examination Services Division  sa ilang buhatan pinaagi sa numerong (032)253-9050;414-7676 ug 414-7488. (BANAT NEWS)