CEBU, Philippines - Nasikop sa mga sakop sa Investigation and Detection Management Branch ang usa ka drayber sa jeep nga gipasanginlan nga naghikap sa iyang pasaherong dalaga sa alas 4:30 sa miaging hapon.
Ang nasikop naila nga si Damel Tabares Perpetua, 36, drayber, molupyo sa Gorordo Avenue, barangay Camputhaw sa dakbayan sa Sugbo.
Ang mireklamo naila nga si Cherry Estipona Mamugay, 18, dalaga, molupyo sa Villa Estelita Subdivision, barangay Bulacao sa dakbayan sa Sugbo.
Base sa spot report sa Cebu City Police Office nasuta nga ang biktima midangop sa buhatan sa IDMB tungod kay gihikap ang pribadong parti sa iyang lawas sa suspetsado.
Sumala pa sa biktima nga mireklamo nga misakay siya sa 12B jeep nga gimaneho sa suspek nga may plate number GXL 559 dihang gihinol siya sa drayber.
Ang biktima kuyog sa mga sakop sa IDMB nga miresulta sa pagkasikop sa suspetsado.
Ang suspetsado gidala sa kapolisan sa Cebu City Prosecutors Office aron mapasakaan sa kasong kalapasan sa Article 366 sa revised Penal Code o Acts of Lasciviousness. (BANAT NEWS)