CEBU, Philippines - Mibisita sa lungsod sa Sta Fe kagahapon sa buntag ang Presidente sa Myanmar Thien Sien aron personal nga ikapadangat niini ang iyang pahasubo ug tabang sa mga nabiktima sa bagyong Yolanda.
Matud pa ni Presidente Sien nga nakasabot siya sa mga gibati sa mga biktima sa maong bagyo tungod kay siya mismo nakasinati usab sa mga nasinatian sa bagyong Yolanda. Sumala pa ni Presidente Sien nga niadtong 2008 gikuso-kuso sa cyclone Nargis ang Irrawaddy region sa Myanmar diin 130 mil ka mga tawo ang nakalas ug 2.5 milyon ka mga tawo ang apektado.
Busa matud pa ni Presidente Sien nga mibati siya sa kasub-anan sa mga nawad-an og membro sa pamilya ug nawad-an sa ilang kabtangan ug panginabuhian.
Apan miingon si Sien bisan pa man sa mga kadaot nga naagian sa mga Filipino malaumon kini nga mobangon ra ang nasud human sa bagyo. With the resilience, courage and spirit of the Filipino you will be able to stand back on your feet again," matud pa ni Presidente Sien.
Midugang si Presidente Sien nga dugay na siya nga giimbitar ni PNOY apan wala dayon kini makatando sa maong imbitasyon ilabi na nga miigo sa nasud ang bagyong Yolanda.
Busa personal niini nga gihuna-huna ang sitwasyon kung angay ba gyud siyang moari.
Nakahukom si Thien nga mobisita sa nasud isip pangulo sa Association of South East Asian Nations (ASEAN) aron usab matabangan ang mga molupyo sa Isla sa Bantayan.
Sa wala pa mobiya si Presidente Thien iyang gipahibawo nga duna siya’y gidala nga usa ka team sa mga doktor gikan sa Myanmar ug mga relief goods alang sa mga biktima sa bagyo.
Matud sa tigpamaba sa Kapitolyo nga si Ethyl Natera nga nadawat na ni Bise-Gobernador Agnes Magpale ang maong hinabang kagahapon sa buntag. (BANAT NEWS)