Mga gagmay’ng negosyante maglisod og bangon

CEBU, Philippines - Mga gagmay’ng mga negosyante o mga small-medium enterprise (SMEs) nangayo karon og tabang sa gobiyerno tungod sa epekto sa super typhoon Yolanda sa ilang mga negosyo.

Matud pa ni Filipino-Cebuano Business Club president Rey Calooy nga maglisod na sila sa pagpabarog og balik sa ilang mga patigayon kung dili sila tabangan sa gobiyerno.

Sumala pa ni Calooy nga aduna pay mga utang sa mga bangko ang mga gagmay’ng negosyante ug maglisod sila pagbayad niini samtang naninguha pa silang makabangon pagbalik.

Sagad sa mga gagmay’ng negosyante na-alkanse  ug wala pa makabalik og pangabli sa ilang negosyo apan nagpadayon ang pagsaka sa interest sa ilang utang.

Ang grupo mihimo og suwat-sugyot ngadto ni Presidente  Benigno Aquino aron hangyoon kini abagahon una sa gobiyerno ang ilang utang sa mga bangko aron dili mosamot og kaut-ot ang ilang patigayon. Misaad sila nga ilaha lang kining bayran kun may igo na silang kita. Ang maong mga gagmay’ng magpapatigayon maoy sagad gitrabahoan sa gibanabanang 2.5 ka milyon ka mga mamumuo dinhi sa Central Visayas nga naapektahan usab karon tungod sa bagyong Yolanda. (BANAT NEWS)