Kapin usa ka libong container vans gibiyaan

CEBU, Philippines -  Kapin sa usa ka libong mga container vans nga gipanag-iya sa nagkada-iyang importers ang giabandonar tungod kay wala molukat og import entry sa Bureau of Customs-Cebu.

Matud pa ni BOC-Cebu district collector Rolando Almadin nga wala pa siya nasayod kung unsa gyud ang sulod sa maong mga container vans kay bag-o pa lang siya nimando nga inspeksyonun kini.

Sumala pa ni Atty. Dante Maranan, ang chief of staff ni Almadin nga ang 1,371 ka mga container vans, gipang-abandonar karon lang tuiga nga anaa karon gibutang sa container yard sa Cebu International Port.

Subay sa balaod, awtomatikong isipon nga giabandonar ang maong mga container vans kung dili mo-file og import entry  ang consignee sud sa 30 ka adlaw.

Dungag pa ni Almadin, ini og human sa inspection sa tanang mga container vans, i-subasta sa BOC ang sulod niini.

Modonar karong adlawa ang BOC-Cebu og 1,500 ka buok nga G.I. sheets ngadto sa usa ka barangay sa San Remegio, Cebu nga maoy magsilbi pasiunang Christmas gift sa ilang ahensya ngadto sa mga biktima sa katalagman.

Ang BOC-Cebu personnel mismo maoy mangunay sa pagpanghatag og gasa sa mga biktima sa bagyo adto sa amihanang Sugbo.

Sumala pa ni Almadin nga manghatag pa sila og ubang donasyon sa mosunod nga adlaw. (BANAT NEWS)