Kasadya sa SRP ablihan karong hapon
CEBU, Philippines - Sugdan karong hapon ang “Kasadya sa SRP†diin ang kagamhanan sa dakbayan sa Sugbo nagtuyo sa pag-andam og lainlaing kalihukan aron paglingaw sa mga mobisita sa South Road Properties.
Si Market Administrator Raquel Arce maoy gisaligan ni Mayor Michael Rama sa pagsuperbisar nga masiguro ang kasadya sa SRP.
Matud ni Arce nga 19 na ka barangay ang mipadayag og kaandam sa pagpahigayon og pasundayag aron paglingaw sa mga mosuroy sa SRP.
Dunay mga magpapatigayon nga gitugotan nga makabaligya sa ilang mga produkto, apil ang mga ukay-ukay nga mga sapot, mga pagkaon ug ubang baligya.
Gitugot usab ang pagbaligya og beer products apan aron sa pag-discourage sa mga batan-on gituyo nila nga mahal ang presyo niini.
Duna say Carnival ug ubang matang sa mga kalingawan sa dili kaayo mahal nga bayranan. Sa Disyembre 15, ang mga tigbaligya og mga pabuto mosugod na sa pag-display sa mga pabuto sa SRP.
Sa ubang mga dapit sa dakbayan aduna ‘say Pasko sa Sugbo nga anha ipahigayon sa Fuente Osmeña Rotunda, dalan Colon ,Pasko sa Downtown, Pasko sa Carbon ug Pasko sa V. Rama. (BANAT NEWS)
- Latest
