Daghang hotel bookings ang gikanselar, DOT milusad sa Bangon Tours aron makabawi

CEBU, Philippines - Mga bookings sa mga hotels sa Cebu gipang-kanselar tungod pag-igo sa sunod-sunod nga kalamidad.

Ang Department of Tourism-7  nagkarakara karon pagmugna og “massive information drive” aron  pag-counter  sa pagkaunlod sa turismo sa nasud. Matud pa ni DOT-7 Regional Director Rowena Montecillo sa gipahigayong press briefing kagahapon, daghang mga turista ang mikanselar sa ilang bookings tungod kay nagtuo sila nga ang Tacloban City mao ang kinatibuk-ang Pilipinas.

Gimugna sa DOT ang "Bangon Tours" aron modani pa og mga langyaw ug local nga mga turista.

Matud ni Montecillo daghan pa gihapong lugar sa Central Visayas ug sa ubang bahin sa nasud ang nindot nga adtoon o suruyan. Gi-promote nila karon ang 16 ka mga lugar sa "Bangon Tours" nga naglakip sa Cebu, Ilocos, Tuguegarao, Baguio, Batangas-Puerto Galera, Manila-Tagaytay, Puerto Princesa, Baler, Bicol, Davao, Bohol, Iloilo, Boracay, Siargao, Cagayan de Oro-Camiguin ug Batanes.

Tungod sa mga kanselasyon sa mga bookings, hayan maglisod ang DOT-7 sa target nga 3.03 milyones nga tourists arrivals karong tuiga.

Gikan sa Enero hangtud Agosto, aduna nay 2.2 ka milyon ka turista nga nanganhi sa Central Visayas. (BANAT NEWS)