Aksidente sa 2009 Mandaue City leksyon pa gihapon sa pagbaligya og pabuto

CEBU, Philippines - Sama sa nangaging katuigan, higpit gihapon nga gidili sa Mandaue City government ingon man sa Bureau of Fire Protection (BFP) sa dakbayan sa Mandaue ang pagpamaligya og pabuto sa tanang dapit niining panahon sa pagsaulog sa Pasko.

Si FO2 Henry Lagumbay sa inspection section nga nahinabi sa Banat News kagahapon mipadayag nga daghan unta kaayo ang nagtinguhang mamaligya niini sa siyudad apan wala sila mohatag kanila og permit. Matud pa ni FO2 Lagumbay nga ilang gibalibaran tungod kay maoy ilang nahukman nga higpit na lamang nila nga idili ang pagpamaligya niini sa maong dakbayan. Giawhag nila ang mga molupyo sa kabarangayan sa pagtaho gilayon sa ilang buhatan niadtong magtagotago sa pagpamaligya sa tago-tago nga paagi aron ilang kahimoan og operasyon sa pagsakmit niini.

Si  Lagumbay miingon nga sa miagi pang tuig 2012 nila nga gidili ang pagpamaligya og paboto sa dakbayan apan iyang giklaro nga ang fireworks ug dili firecrackers ang gitugotan nga mabaligya sa sulod sa estante sa mga department stores.

Niadtong Disyembre 2009, usa ka makalilisang nga aksidente ang nahitabo sa siyudad sa Mandaue dihang aksidenteng miulbo ang 50 ka nagtupad-tupad nga mga tindahan sa pabuto nga miresulta sa kamatayon sa tulo ka tawo nga naglakip sa usa ka mabdos ug 7-anyos nga bata, unom ang nangaangol og kapin sa P100 mil nga pabuto ang nadanyos. Ang lugar nga nahitaboan mao ang barangay Sentro nga gideklarar unta nga firecracker zone, apan gumikan sa kakulangon sa safety measures nahitabo gyud ang maong trahedya. (BANAT NEWS)