Mr. Barangay

Naa ko’y nadawat nga reklamo bahin aning bag-ong gipatuman sa TEAM Mandaue nga no stopping diha sa dalan Plaridel Mandaue city karong bag-o lang.

Basi sa akong nadawat nga reklamo nga hapit tanang area sa Plaridel Street wa nay stopping area gawas lang didto sa may karaang Tita Gwapa sa may Brgy Opao. Kun mao man gani kini masabot nato nga gikan sa Mandaue City Comprehensive National High School hangtod na sa eskina Opao wala nay makahunong nga sakyanan?

Kun tinuod man gani kini, asa na man manaog ang mga pasahero nga molupyo diha sa Looc, Cambaro ug ubang dapit sa Alang-alang kun mosakay sila’g jeep nga moagi diha sa Plaridel Street? Kun magsakay ka’g taxi unya ang imong gipuy-an naa kilid sa karsada diha sa Cambaro dili na pwede, kay adto ka hunong sa Opao? Angayan tingali nga tan-awun pag-ayo sa TEAM pinaagi ni Sir Edwin Ermac kining bag-o nilang gipatuman nga "no stopping" diha sa Plaridel Streets.

Makasabot man tingali ta anang gihimo sa TEAM arun mahapsay ang dagan sa trapiko sa maong lugar apan para nako dako ning hasol sa mga molupyo sa duha ka barangay labi na sa mga estudyante sa mga dagkong tunghaan diha.

Tiaw ba nimo kun mangumpra ka gikan sa bag-ong merkado padung sa Cambaro adto ka ihunong sa Opao unya inig abot nimo didto mosakay na sad ka’g balik og jeep padung sa Cambaro unya kay wala man gihapo’y stopping sa lugar adto na ka hunong may North Reclamation Area. Ang mahitabo dili naka kauli inyong balay kun magsakay ka, molakaw na lang ka’g pila ka kilometro para lang ka kauli sa inyong pinuy-an. Haskang libuga aning gihimo sa TEAM, ambot kun nagtan-aw ba ni si Ermac sa kahasol nga matagamtaman sa mga pasahero o basin tapulan lang na sila motrabaho pagbantay sa mga dapit nga daghang badlungon nga driver maong giangin ang tanan hastang mga pasahero.

Brgy Lambusan, San Remegio, Cebu

Sir Jun unsa man ni taga munisipyo nga dili man mi hatagan og ticket para relief goods kun dili mangguna, ngano dili na man lang nila hatagan deretso sir nga kabawo na man sila nga biktima gyod mi sa bagyo.

Brgy Talisay, Daan Bantayan, Cebu

Ang mga tawo diri sir nangahadlok na tungod aning mga report nga naay mga nanunggo diri nga mga pumpboat nga dunay sakay nga armadong mga tawo kay manaka kuno’g kabalayan, kuyawan na mi diri.

Brgy Kawit, Medellin, Cebu

Diri sa among barangay pulos na man lang bugas ug sardinas ang gipanghatag asa na man diay tong gipasalig nilang mga materyales para balay nga mao gyod untay importante namong panginahanglan.

Alang sa inyong mga reklamo text lang sa 09163869202.