AirAsia Zest miabli sa ruta nga Cebu ug Kuala Lumpur

CEBU, Philippines - Gilusad sa AirAsia Zest ang labing bag-o ug unang direktang international flight nga Sugbu ug Kuala Lumpur, ang capital sa Malaysia sa miaging Disyembre 1, 2013.     

Nilarga ang Airbus- A320 sa AirAsia Zest gikan sa Sugbu sakay ang pipila ka mga sakop sa media ug blogger ug pagbalik niini, gidala sakay sa flight Z2 187 ang 128 ka mga turista  sulod sa upat ka oras nga biyahe.    

Sa pag-abot sa Mactan-Cebu International Airport Authority (MCIAA) gikan sa Kuala Lumpur mga alas 2:50 sa hapon, gikaligo og tubig  sa bombero ang abyon.       Ang kadagkuan sa AirAsia Zest niingon nga kini makatabang sa turismo sa Sugbu.      Matud ni Joy Caneba, Air Asia Zest executive Vice-President and chief- operating officer,  mosentro sila sa pagtukod og usa ka masaligang kompanya nga moalagad sa mga panginahanglan sa mga biyahero ug pagpakita sa industriya sa turismo sa Sugbu.       Midugang siya, nga kining gilusad nga KL flight mopalambo sa patigayon ug komersiyo.     

Si Nigel Paul Villarente, MCIAA General Manager, niingon nga  ang paglusad sa Air Asia Zest makatabang sa pagpatuman sa gi-planohang kausaban sa Cebu Airport.    

Lakip niini ang paglupad sa Kota Kinabalu, Malaysia ug ang Incheon, South Korea.     Ang 13 ka abyon karon sa AirAsia Zest moserbisyo sa mga lokal nga destinasyon sa Kalibo, Puerto Princesa, Cebu, Davao, Tacloban, Tagbilaran, Ilo-ilo, Bacolod ug Cagayan de Oro kauban ang International points sa Asia nga China ug South Korea. (WC)(BANAT NEWS)