Armadong lalaki napusilan sa police checkpoint patay
CEBU, Philippines - Napusilan patay sa mga sakop sa Theft and Robbery Section sa Cebu City Police Office ang usa ka gikadudahang tulisan human kini molayat sa taytayan duol sa checkpoint sa Imus Road sa dakbayan sa Sugbo sa miaging gabii.
Sumala pa ni SPO2 Leopoldo Bauzon nga nahinabi sa Banat News nga samtang nagpatrolya sila sa dalan Osmeña Boulevard dihang usa ka drayber sa jeepney ang nagpatabang nga duha ka armadong mga lalaki ang bag-ohay lang nanganaog sa iyang jeepney.
Matud ni Bauzon nanakay sa may Fuente Osmeña ang duha apan pag-abot sa dalan P.del Rosario nakabantay nga nagsunod ang unmarked patrol vehicle sa TRS maong nanglayat sila sa jeep.
Sumala pa nga ang usa mikaratel og dagan ug wa na igkita apan ang usa mition og armas sa nagmotorsiklong si Dariel John Cadenas,24, ug mimando nga padaganon ang motor.
Apan pag-abot sa may Imus Road nakabantay ang lalaki nga dunay checkpoint sa Pari-an Police Station maong gipasirit kini ni Cadenas ug gibangga didto sa checkpoint hinungdan sa pagkaratel og dagan sa armadong lalaki ug miambak sa taytayan duol sa DepEd District Office.
Sumala pa nga gipaulanan og bala sa maong lalaki ang mga polis nga migukod hinungdan sa pagbawos og pabuto sa mga polis pinangulohan ni Sr. Inspector Ardoelito Cabagnot ug si PO3 Alex Buanghog.
Ang maong lalaki nakaangkon og daghang samad pinusilan sa iyang lawas hinungdan sa kamatayon niini.
Narekober sa crime scene ang usa ka .9mm Llama pistol, usa ka magazine sa 9mm, unom ka bala sa 9mm, duha ka kabhang sa kalibre .45 ug duha ka kabhang sa 9mm. (BANAT NEWS)
- Latest
