Bana nga nagmaoy sa ilang balay gipusil sa asawa

CEBU, Philippines - Usa ka bana nga giingong nagmaoy tungod sa kahubog ang gipusil sa iyang asawa diha  sa sitio Pobre Bungtod, barangay Can-asujan sa dakbayan sa Carcar sa alas 6:00 sa miaging gabii.

Ang napusilan naila nga si Perry Saura, taga sitio Pobre Bungtod, barangay Can-asujan sa dakbayan sa Carcar giingong ang nagpusil kaniya mao ang iyang asawa nga si Mila Saura.

Basi sa spot report sa kapolisan sa dakbayan sa Carcar, usa ka security guard sa Carcar Provincial Hospital ang mipahibalo kanila nga dunay usa ka lalaki nga biktima sa pagpamusil nga nalandig sa ilang tambalanan.

Nasuta sa imbestigasyon ni Sr. Insp. Edward Villarin nga gikan nag-inom ug hubog na nga nauli ang biktima apan pag-abot didto giingong gibato niini ang ilang balay.

Gikatahong gibadlong kini sa asawa apan wala gyud manumbaling ug sa kahadlok ug kalagot sa asawa nga maigo unya ang iyang mga anak mikuha kini sa wala pa matino nga armas ug mipusil sa iyang bana.

Human sa hitabo daling misibat ang asawa sa ilang balay ug dali sab nga gidala sa tambalanan ang biktima sakay sa usa ka habal-habal kuyog ang iyang ugangan nga lalaki.

Apan gibalhin sa usa sa mga tambalan sa dakbayan sa Sugbo ang biktima nga nagpa-alim pa sa iyang samad. (BANAT NEWS)