South African team mopauli na sa ilang nasud

CEBU, Philippines - Mopauli na ngadto sa ilang nasud ang mga sakop sa South African Disaster Response Team karong semanaha human sa ilang pag-abag sa mga biktima sa bagyong Yolanda didto sa probinsiya sa Leyte.

 Kini ang pamahayag ni South African Ambassador Agnes Nyamande Pitso atol sa paghatag og pasidungog kanila sa Central Command sa milabay’ng adlaw.

Matud pa ni Pitso dili lamang kini ang katapusan sa mga hinabang nga madawat sa mga biktima sa bagyong Yolanda sa probinsiya sa Leyte ug amihanang bahin sa Sugbu gumikan kay mobalik pa kini alang sa pagsiguro nga makabarog na ang mga residenteng naapektuhan sa maong trahedya.

 Unang mobiya sa nasud mao ang mga medical personnel nga ilang gidala ngadto sa lungsod sa Villaba, Abuyog ug Palompon Leyte  alang sa medical mission sukad pa niadtong Nobiyembre 17 apan ang uban magpabilin pa hangtod sunod semana alang sa maong mission.

Gipasalamatan ug gipasidunggan ni Centcom incoming Commander Maj. Gen. John Bonafos ang maong response team sa South Africa pinangulohan sa ilang Chief Executive Officer Ian Scher sa ilang pagresponde sama sa pagtabang sa clearing operations ug pagbutang og mini hospital.

Lakip sa gihatag sa South Africa mao ang balor 10 milyones nga pagkaon ug medical equipments alang sa ilang humanitarian aid mission sa nasud.

Lakip sa gipasidunggan mao si Jude Darry del Rio ang tag-iya sa Judfeland Foods Corp. Sa ilang pag-abag sa pagkaon sa mga sundalo atol sa krisis sa dakbayan sa Zamboanga ug paghatag og balor 500 mil ka pesos nga hinabang ngadto sa kagamhanang probinsiyal sa Bohol atol sa 7.2 magnitude nga linog sa maong lalawigan.