10 mil ka panagatan himuon sa BFAR

CEBU, Philippines - Ang Bureau of Fisheries and Aquatic Resources-7 molusad karong adlawa sa ilang proyektong "Build-a-Boat" adto sa Crown Regency Hotel and Towers, Cebu City.

Si Alma Saavedra, information officer sa BFAR-7 nagkanayon ang maong proyekto gimugma aron sa pagtabang sa panginabuhian sa mga mananagat nga nagpuyo sa coastal communities nga naigo sa kabangis sa super typhoon Yolanda.

Gikatakdang maghimo og 10,000 ka mga fishing boats dinhi sa Central Visayas aron maoy ipuli sa nangaguba ug nangalunod nga mga panagatan.

Si  BFAR national director nga si Azis Perez maoy mangunay sa launching sa maong proyekto. Base sa talaan sa BFAR, dunay inisyal nga 5,995 ka mga  mananagat sa Cebu nga nawagtangan sa ilang panginabuhian tungod sa bagyong Yolanda.

Giingong moabot sa 1,836 ka motorized banca ug 704 non-motorized banca sa mga mangingisda ang nagusbat sa maong bagyo. (BANAT NEWS)