Rotational brownouts mas mograbe
CEBU, Philippines - Mas daghan nang mga lugar nga nasakop sa franchise area sa Visayan Electric Company ang nakasinati og rotational brownout sugod pa sa miaging adlaw.
Matud pa ni Theresa Sederiosa, ang tigpamaba sa VECO nga nisaka kagahapong adlawa og 70 MW ang kakuwang sa suplay sa kuryente gikan sa 40MW lang niadtong usang semana.
Matud pa ni Sederiosa nga kini nahitabo kay nagsugod na usab paggamit og kuryente ang Cebu Electric Company II, ang Panay, Bacolod ug Iloilo.
Kahinumduman nga napalong ang tanang suga ubos sa Cebeco II nga nagserbisyo sa mga lungsod sa amihanang Sugbo sulod sa duha ka semana.
Apan human na-repair ang ilang mga linya nabalik na kini niadtong Nobiyembre 21 apan ang mga backbone lines o major lines pa lang niini ang dunay kuryente samtang padayon pa ang pag-ayo sa mga lateral lines o kadtong mga linya padung sa kabarangayan.
Matud pa ni Sederiosa nga niadtong miaging semana, tulo ka mga lugar kada adlaw ang nakasinati og rotational brownouts apan ning bag-ohay lang nahimo na kining upat na ka lugar.
Dungag pa ni Sederiosa nga posible pa gyud nga moabot og lima ka lugar ang makasinati unya og rotational brownouts matag adlaw.
Gibanabana sa VECO nga kung mangaayo na ang tanang linya sa transmission lines sa National Grid Corporation of Philippines, moabot pa og 150MW ang ilang kakuwang sa suplay sa kuryente tungod kay mokabit na man ang ubang mga lugar nga nawad-an usab og kuryente.
Duha ka power plants sa Leyte, ang Tongonan Geothermal Power Plant ug Unified Leyte, padayon pa nga giayo human kini naguba tungod sa bagyong Yolanda.
Gumikan niini, dili makapadala og paigong suplay sa kuryente ang Leyte dinhi padulong sa Sugbo. (BANAT NEWS)
- Latest
