Mga Christmas decors nga may ICC mao ray ipapalit

CEBU, Philippines - Ang hepe sa Talisay City Fire Department nga si Senior Inspector Randy Mendaros miawhag sa publiko nga ang pamalitong Christmas lights o mga electronics nga mga dayan-dayan sa Pasko pilion ang dunay markang ICC o Import Commodity Clearance.

Niining pagsaulog sa Pasko ug Bag-ong Tuig dunay mga tawo nga mamalit gyud og mga dayan-dayan hinungdan nga si Mendaros nanawagan sa publiko nga pilion sa mamalitay ang dunay markang ICC ilabi na ngadto sa electronic Christmas decors aron malikayan ang sunog.

Matud niya nga ubang hinungdan sa sunog ang mga substandard nga Christmas lights.

Gibutyag ni Mendaros nga gikatakda silang mosuroy diha sa mga tindahan sa siyudad diin usa nilang tumong mao ang pagsusi sa mga gipamaligyang Christmas decors gawas niini manghatag usab unya sila og mga flyers nga magpahinumdum sa publiko aron malikayan ang sunog.

Apan gawas sa mga substandard nga Christmas decors laing hinungdan sa sunog mao ang overloading ug octopus connection.

Gipasabot ni Mendaros nga ang overloading daghang migamit sa kuryente o  mi-connect sa usa ka linya diin ang wiring sa connection sa kuryente gagmay ug dili makasugakod hinungdan nga mobuto kini nga maoy hinungdan sa sunog.

Ang octopus connection usab daghang isak-sak nga appliances sa usa ka outlet nga usa sa laing hinungdan sa sunog tungod kay posibleng moinit ang outlet o ma-short circuit.

Dugang ni Mendaros nga ang publiko kinahanglang magpakabana usab kini aron malikayan ang aksidente. (BANAT NEWS)