Dugang 200 evacuees nangabot sa Lapulapu City

CEBU, Philippines - Dugang 200 ka mga evacuees gikan sa Tacloban City luwan sa barko sa Philippine Navy ang miabot sa mga evacuation centers sa Lapulapu kagahapon sa hapon.

Pag-abot sa pantalan sa Naval Forces Central o NAVFORCEN sa mga evacuees gisugat kini og pagkaon sa lokal nga kagamhanan sa dakbayan sa Lapulapu nunot sa pagsaulog sa bisperas sa kapistahan sa Birhen sa Regla kagahapon.

 Matud pa ni Jonjie Gonzales, ang Public Information Officer sa dakbayan sa Lapulapu nga siya ug ang mga sakop sa Sangguniang Kabataan o SK sa dakbayan sa Lapulapu maoy gitahasan ni Lapulapu City Mayor Paz Radaza sa paghatag og pagkaon ngadto sa mga miabot nga evacuees gikan sa Tacloban aron masudlan dayon ang mga tiyan sa mga biktima sa kalamidad.

Gumikan niini ang mga sakop sa SK ug mga batan-ong bloggers sa dakbayan sa Lapulapu mihimo dayon og mga lakang sa pagpangita og paagi nga makapamista ang mga evacuees.

Ang mga evacuees nga nakadawat sa maong pagkaon dako’g pasalamat sa maong grasya nga gipaambit sa mga katawhan sa dakbayan diin daghan kanila ang wala pa makadawat og hinabang gikan sa nasud.Ang mga evacuees gipahimutang na karon sa mga covered court sa Brgy. Looc, Gun-ob ug Babag diin giatiman kini sa mga sakop sa DSWD ug sa mga opisyal sa barangay. (BANAT NEWS)