Relief goods nagkaanam na og abot sa tanang mga biktima

CEBU, Philippines - Hinay-hinay nang nagkadaghan ang mga relief goods alang sa mga biktima sa super typhoon Yolanda dili nunot sa pagdagsa sa mga foreign aids, gobiyerno ug mga pribadong organisasyon.

Niadtong Sabado ug Domingo, nakahigayon ang nagkadaiyang local government units sa Sugbu ingon man ang mga private organizations, concerned citizens paghatud og hinabang didto sa Northern Cebu. Tungod sa gidaghanon, nagka-traffic gikan palang sa Carmen hangtud na sa Bogo City.

Ang DyRC Radio Calungsod –Cebu ingon man ang DzRH ug Kapisanan ng mga Brodkaster ng Pilipinas Cebu Chapter radio stations nakahatud na og  inabagan sa Don Bosco volunteers nakahatud og mga relief goods sa nagkadaiyang mga lugar nga naapektahan sa bagyong Yolanda.

Ang mga lugar nga gidad-an og relief goods sa grupo mao ang mga lungsod sa northern Cebu nga naglakip sa Daanbantayan, Medellin ug Tabogon.

Natandog og maayo ang mga volunteers pinangulohan sa station manager sa DyRC nga si Niño “Bonito” Padilla sa naabtan didto sa northern Cebu nga daghan pa gihapon kaayo ang panginahanglan nga wala maabot sa mga biktima bisan usa ka semana na ang milabay.

Ang mga bata nagpaabot ilawom sa naglagiting nga kainit sa adlaw nga nagbitbit og karatola nga nangayo og hinabang sama sa tubig ug pagkaon. Ang DyRC-Cebu inabagan usab sa barangay Apas sa Cebu City pinangulohan sa anchorman nga si Kapitan Ramil Ayuman mihatud og relief goods sa sister barangay niini.

Ang mga hinabang nga gilangkoban sa mga food packs, tubig ug mga used clothings, nahatud ngadto sa upat  ka mga barangay sa lungsod sa Medillen nga personal nga gihatud sa relief team.

Samtang bisan ang kinalayo-ang isla sa Camotes nga mao ang lungsod sa Pilar , giadto ug gihatdan kini sa team niadtong adlaw nga Biyernes.

Gamit ang usa ka BO-105 helicopter sa Philippine Coastguard tulo ka higayon nga gibalik-balikan og hatud ang mga relief goods sa maong isla.

Ang maong mga relief goods gidonar sa mismong mga taga Pilar nga gipangulohan ni Ryan Borinaga, anchor sa Okrayan sa DyRC ug editor sa Banat Hugyaw nga lumad sa maong lungsod.

Ang Pilar nag-atubang sa Ormoc City nakaangkon usab og mga danyos ilabi na sa ilang mga kabalayan ug mga pananom.

Sa pag-abot sa chopper didto sa maong isla naabtan pa ang mga nangatumbang mga pananom sama sa mga lubi ug nahapay usab ang kasagingan.

Pipila ka mga eskuylahan usab ang gipangupawan sa ilang mga atop ug dili pa maklasehan. Samtang tulo ka trak nga relief goods ang gihatud sa grupo sa Tacloban City ug Ormoc City niadtong Sabado sa kaadlawon.

Karong adlawa sugdan na ang pag-apud-apod niini ug ingon man ang pagbutang og food stations alang sa lamian ug sustansyadong lugaw aron makatabang sa mga bata ug bisan na sa mga dagko sa ilang kagutom.

Nangapud-apod usab sila og 200 ka mga radio transistors nga may dalang baterya alang sa mga community leaders aron ma-monitor nila ang mga panghitabo.(/EIM)(BANAT NEWS)