Kasong murder batok sa mipatay sa iyang uyab

CEBU, Philippines - Gitakdang pasakaan og kaso   sa Korte karong adlawa  ang usa ka tawo nga mipatay sa iyang hinigugma  sulod sa lawak sa Cresly Beach Resort sa Landing, barangay Catarman, lungsod sa Liloan niadtong Nobiyembre 16 sa gabii niining tuiga.

Ang pasakaan og kasong murder mao si Domecito Avila Estopa, 40, nga taga Tabunok, Maslog sa dakbayan sa Danao.  Si  Estopa  maoy suspetsado sa pagpatay kang Sol Sabado Enriquez, 54 , dalaga, nga taga Tabok, Camalig-Bato sa  Danao.

Sa nasayran sa imbestigasyon ni SPO4 Winrie Pilapil sa kapolisan sa maong lungsod, nasayran nga mi-check-in  ang biktima ug ang suspetsado sa usa sa mga lawak sa nahisgotang beach resort.

Sumala ni Benjie Recamora, tag-iya  sa maong  resort  nga ilang namatikdan nga paglabay sa pipila ka gutlo naglalis ang duha   ug  naglinagubo  ang  sulod  sa lawak. Midugang  si Recamora nga human niadto  nagdali  nga migawas  si Estopa.

Ila  kining  gipangutana kun    asa  siya paingon, apan  mitubag  kini  nga magpalit   siya  og pagkaon.

Apan  tungod  kay  natahap si Recamora  ila  kining gipugngan ug gipasusi una ang lawak.

Didto  ilang  nakita  nga  nagbuy-od  na  sa sawog sa  sulod  sa lawak  ang  biktima  nga wala  nay  panimuot.

Dali  kining gihatud  ngadto sa Danao District Hospital sa kapolisan nga nakatubag sa maong alarma apan gideklarar kini sa mga doktor nga dead on arrival.

Ang suspetsado nga gidakop sa kapolisan kasamtangang nagtingkagol sa  bilanggoan ug karong adlaw ipasaka na ang kasong murder  batok kaniya. (BANAT NEWS)