Duha ka patay’ng lawas gianod sa Pilar

CEBU, Philippines - Duha ka mga patay’ng mga lawas ang napalgan nga naglutaw sa dagat sa mga molupyo sa  barangay San Isidro sa lungsod sa Pilar sa alas 6:00 sa buntag sa miaging adlaw.

Ang maong mga patay nga lawas nagsugod na sa pagkadugta ug matud pa posible kini nga gikan sa Leyte ug napadpad sa Pilar.

Matud pa sa spot report sa Cebu Provincial Police Office nga usa ka Celestino Gosio ang mitaho sa kapolisan nga dunay napalgan nga patay nga lawas nga naglutaw sa kadagatan.

Si Dra. Eufemia Maratas ang Rural Health Officer sa lungsod sa Pilar uban sa mga polis misusi sa mga lawas.

Matud pa nga ang maong patay nga lawas nagsugod na sa pagkadugta nga nagsul-ob og green nga shorts nga may drawing nga flag sa Pilipinas nga may marka nga Pilipinas.

May gitas-on nga 5'4" ang patay nga lawas ug naputos kini og bun-og sa tanang bahin sa iyang lawas. Samtang mga 100 metros ang gilay-on sa patay nga lawas duna say lain pang patay nga lawas ang nakit-an sa usa ka bata. Matud pa nga ang maong patay nga lawas gibana-bana nga nagpangidaron og 30-40 anyos, 5'4", nagsul-ob og sweat shirt nga color green nga may marka nga General Services sa likod ug nagsul-ob kini og blue nga shorts. Ang duha ka mga patay nga lawas gilubong sa Montserrat Cemetery human kini nakuhaan og hulagway.  (/EIM)(BANAT NEWS)