500 evacuees naa sa PAF Base naghugop

CEBU, Philippines - Mikapin  sa 500 ka mga bakwit   gikan sa dakbayan sa Tacloban ang anaa karon sa base militar sa Philippine  Air Force (PAF) sa Mactan Benito Ebuen Air Base (MBEAB) sa dakbayan  sa Lapulapu.

Matud pa ni Brig. Gen. Raymundo Elefante ang Base Commander sa 560th Air Base Wing sa MBEAB nga hangtod sa ilang makaya nga maatiman sa ilang tambalanan ug gymnasium ang  maong  mga   bakwit ila kining dawaton ug atimanon.

Hinuon  ang bugtong reklamo ni Gen. Elefante mao ang pagdagsa sa mga buot mosakay sa C-130 padung sa Tacloban apan  dili kini  maoy  prayoridad sa abyon  sa  Air Force karong panahona kundi  ang  mga relief goods   nga  ikarga  paingon  ngadto sa mga dapit nga apektado  sa bagyo. Mihangyo si Gen. Elefante sa katawhan nga motabang na lang sa pagrepaki sa mga hinabang nga anaa karon sa PAF Gym inay magtinguha sa paglarga ngadto sa Tacloban.

Ang mga sakop sa DSWD nasaksihan sa Banat News nga miabag usab sa mga sakop sa PAF sa mga panginahanglan sa mga  bakwit pinaagi sa pagpakaon ug pagpangita sa mga kabanay niini dinhi sa Sugbo. Matud pa ni Edna Regudo sa DSWD ang mga  bakwit nga adunay mga paryente dinhi sa Sugbo ilang gitabangan sa pagpangita ug ihatod sa ilang mga kabanay.

Ang mga masakiton  nga anaa sa PAF Base Hospital ug ang uban ilang gitugyan sa mga tambalanan sa dakbayan sa Sugbo ug Lapulapu  nga  mapasalamaton kaayo nga wala balibari sa mga tagdumala sa mga tambalanan. Hinuon nahatagan og pagkaon ang maong mga bakwit  pinaagi sa mga sakop sa Airmens Village sulod sa MBEAB ug mga miyembro sa PAF Officers Club. May dugang  pang mga evacuees  nga   gitakdang moabot dinhi sa Sugbo luwan sa C-130 sa PAF ug gipasalig ni Gen. Elefante nga  kanunay   nga  anaa  sa maayong kondisyon ang ilang abyon sa paghakot sa mga   bakwit  ug relief goods alang sa mga biktima. (Bong Soriano/WC)

Mga bakwit gikan Leyte giatiman sa DSWD7

Ang Department of  Social Welfare and Development-7 ni-atiman sa mga evacuees  nga  gikan  sa Tacloban City nga namakwit  dinhi sa Sugbo. Matud pa ni Aileen Arriba, ang information officer sa DSWD-7 nga ila nang giandam ang pagkaon ingon man ang evacuation center sa siyudad sa Sugbo sa kapin 300 ka pamilya nga namakwit. Apan matud pa ni Arriba nga basin mokapin pa sa 300 ka pamilya ang nahiabot na diri kay padayon pa ang ilang pag-ihap kagahapon sa hapon. Iya pang sutaon kung pila ka indibidwal ang ania na   sa Sugbo. Ang mga evacuees gikan  sa Tacloban City, Leyte kansang mga balay  nangaguba  nga  murag gikumot-kumot sa dihang naigo sa super typhoon Yolanda.

Gipasakay ang  evacuees sa C130 sa Philippine Air Force.

Sayo niini,  misuwat si DSWD-7 regional director Mercedita Jabagat ngadto kang Cebu City Mayor Michael Rama bahin  niini. – (FREEMAN)