Pagtabang sa Talisay City sa ubang lugar gisaway

CEBU, Philippines - Dunay pipila ka mga residente sa dakbayan sa Talisay ang giingong nagbagulbol kabahin sa pagpadala og hinabang sa kagamhanan sa siyudad ngadto sa laing lugar nga naapektohan sa bagyong Yolanda.

Base sa report nga nanuyo ang pipila sa mga nagrabehan sa Talisay City  tungod kay giuna sa siyudad og tabang ang ubang dapit inay nga sila maoy tagdon.

Base sa ulahing talaan sa city social welfare mokabat ngadto sa 3,425 ang apektadong pamilya sa Talisay City.

Apan matud sa hepe sa city social welfare nga si Felipa Solana nga ang tanang diha sa evacuation center nahatagan na nila og hinabang sama sa bugas, sardinas ug noodles.

Samtang kadtong mga pamilya kansang mga balay nangaguba hatagan og mga housing materials sa siyudad.

Niadtong Domingo ang siyudad mipadala  og hinabang sa lungsod sa Medellin gamit ang pundo sa siyudad bisan walay resolusyon nga giluwatan ang konseho.

Base sa Akta Republika 7160 kon “Local Government Code,” sa panahon sa kalamidad ug kung ang Provincial Government modeklarar og state of calamity sa tibuok probinsya, wala na kinahanglana pang modeklarar ang mga konseho sa mga lungsod.

Tumong niini nga mapadali ang pagtabang sa mga nagkinahanglan nga dili na mag-agi og taas nga proseso. Niadtong Lunes sa gabii, mismong si Presidente Benigno Aquino III ang mideklarar sa tibuok nasud nga ilawom sa state of calamity aron mapadali ang pagtabang sa mga apektadong mga lugar.

Apan si Talisay City councilor Dennis Basillote nagkanayon nga walay problema kun motabang apan matud angayang tan-awon una ang kaugalingong “tugkaran” tungod kay ubay-ubay man ang naapektohan sa bagyo. (BANAT NEWS)