Motor nabangga sa poste nagsakay patay

CEBU, Philippines - Usa ang patay sa duha ka managlahing aksidenti sa kadalanan sa lalawigan sa Sugbo sa miaging adlaw.

Ang  namatay  mao  si Roque Capacio, 41, minyo,  nga taga  Nagbangon,  sa lungsod   sa Compostela.

Ang  biktima nagsakay  sa  iyang Honda Wave  nga  motorsiklo nga  may  plate  number  nga ZH 5395 dihang  nabangga  kini  sa poste  sa kuryente  didto  sa kurbada  nga  bahin   sa sitio Tapon, barangay Sta. Filomena, lungsod sa Alegria sa alas 7:00 sa miaging gabii. Ang  grabe  nga  mga  samad  ug  bun-og  sa iyang  lawas  maoy namatyan  sa biktima.

Dali kining  gihatud ngadto sa Reinhard Wirtgen Memorial Hospital sa Poblacion Alegria apan gideklarar kini ni Dra. Luz G. Soria nga dead on arrival.

Samtang nagusbat  ang  payag sa usa  ka  magtiayon dihang  gidaro  kini sa usa ka bus de pasaheroan didto  sa sitio Kantakuyan sa barangay Bongon, sa lungsod sa Tabuelan sa 11:05  sa miaging  buntag. Ang maong bus nga may plate number GWN 147 gimaneho ni Elmer Bravo Orcales ug gipanag-iya sa Ritchie Bus Liner nga may pasahero nga 30 ka tawo.

Samtang ang payag  nga  nabungkag  gipanag-iya ni Johnriel Balves Cole ug ni Enriquita Savior Torrefel , pulos  nagpuyo  sa maong  dapit.

Base sa imbistigasyon,  ang  bus  may pasahero  nga 30 ka tawo  dihang  nawad-an  kini  og  preno  samtang  nagdagan hinungdan  nga  wala  na mapugngi  sa drayber.

Ang bus  nagpaingon  sa  Poblacion, Tabuelan ug  hinuon  walay  naangol  sa  mga  pasahero  niini. (BANAT NEWS)