Dunay mga kapitan nga nanumpa na sa BOPK nanumpa sab kang Rama
CEBU, Philippines - Dunay mga kapitan sa barangay sa dakbayan sa Sugbo nga nanumpa sa ilang katungdanan kaniadtong Domingo atubangan kanila ni Kongresista Raul del Mar ug Rodrigo Abellanosa apan kagahapon mihimo sila og subli nga pagpanumpa atubangan ni Mayor Michael Rama.
Usa kanila si Kapitan Harry Eran sa Barangay Cogon-Pardo, matud niya nga mihatag lang siya og “courtesy†sa mayor nga giisip nga maoy amahan sa dakbayan.
Kadtong 37 ka barangay kapitan ug daghang mga konsehal nga nanumpa atubangan sa duha ka kongresista kaniadtong Domingo gihulagway nga mga alyado sa Bando Osmeña Pundok Kauswagan (BOPK).
Apan miiknat ang kilay sa ubay-ubay’ng mga tawo nga nakakita sa pipila niadtong mga opisyal nga nanumpa atubangan nila ni Del Mar ug Abellanosa kay nanumpa usab sila atubangan ni Rama kagahapon. Si Rama miingon nga dili niya hatagan og igo nga pagtagad ang maong isyu apan nalipay siya nga ang maong mga opisyal sa barangay miila nga siya maoy amahan sa dakbayan.
Si kanhi kongresista Tomas Osmeña nga lider sa BOPK namahayag nga dili siya masuko kun ang iyang mga kaalyado nga mga opisyal sa barangay moyukbo usab ni Rama.
Matud ni Osmeña nga nasayod siya nga ang iyang mga kaalyado nga opisyal sa barangay napugos lang pakigsuod kang Rama kay aron makakuha sila og mga proyekto sa dakbayan.(/EIM)(BANAT NEWS)
- Latest
