PRO7 mipada’g finger print expert sa Tacloban

CEBU, Philippines - Gipadala na sa Crime Laboratory 7 ang usa ka finger print expert ngadto sa dakbayan sa Tacloban aron pagtabang sa pag-ila sa mga nakalas sa bagyo.

Si Chief Insp. Benjamin Lara sa Crime Lab nga nahinabi sa Banat News miingon nga milarga na sa Tacloban ang maong finger print expert kuyog sa mga eksperto  nga gikan sa Manila.

Matud ni Chief. Insp. Lara nga ang gipadala mao si Insp. Atelano Fabella nga usa ka finger print expert sa crime lab.

Tungod sa kadako sa kadaot nga nahitabo sa maong  lugar  mitabang ang Philippine National Police sa pagpadala og mga eksperto.

Dugang ni Lara nga ang lead agency sa pag-ila sa mga nakalas mao ang National Bureau of Investigation (NBI) tungod kay natural disaster ang nahitabo, ug ang PNP karong higayona mosuporta lang sa NBI.

Midugang si Lara nga posibli pa nga madugangan pa ang ipadala sa ilang buhatan sa sunod nga wave sa mga eksperto ngadto sa Tacloban.

Si Cleofe Saavedra sa Investigative Team sa NBI miingon nga wala pa sila’y nadawat nga hangyo para sa ilang mga eksperto nga motabang pag-ila sa mga nakalas sa Tacloban.

Apan miingon siya nga posibling magpadala sila kun makadawat na sila og request  gikan sa ilang kauban nga buhatan sa Region 6.

Matud pa ni Cleofe nga ang Regional Director sa NBI 7 Atty. Antonio Pagatpat tua pa karon sa Tacloban tungod kay nabiktima usab kini sa maong trahedya ug wala pa makabalik sa Sugbo. (/WC)(BANAT NEWS)