Pagkunhod sa supply sa isda gikabalak-an

CEBU, Philippines - Gikabalak-an sa kagamhanan   ang pagkunhod sa supply sa isda gikan sa amihanang kalungsoran sa lalawigan sa Sugbo  human  kini  kuso-kusoa   sa bagyong Yolanda nga nakaguba  sa ilang  mga  panagat.

Matud pa ni Dr. Allan Poquita, assistant regional director sa Bureau of Fisheries and Aquatic  Resources (BFAR) 7  kagahapon nga  gipangulohan  ni BFAR Director Edgar Bojos  ang pagsusi sa mga kadaut sa mga panagatan sa mga molupyo sa maong   mga dapit.

Nasayran  nga  ang  daghang  isda  sa Pasil Fish Market  sa dakbayan  sa Sugbo kasagaran  gikan  sa Daanbantayan  ug  Bantayan  island  nga  maoy  nasabak  pag-ayo  sa bagyong  Yolanda.

Dugang pa ni Dr. Poquita nga sa pasiunang kasayoran nga nahipos sa ilang buhatan,  may  unom ka fishing boat ang nalunod sa maong bagyo   nga mikalas pa og kinabuhi sa mga tripulante niini.

Si Dr. Poquita miingon ang mga lungsod sa amihanang lalawigan nga naglakip  sa mga lungsod sa isla sa Bantayan ug Camotes maoy nag-una nga panginabuhi sa mga molupyo ang panagat.

Gitataw niya nga sagad sa isda nga gitumod sa  Pasil sa dakbayan sa Sugbo, dakbayan sa Mandaue  ug  mga sikbit nga dakbayan nini, gikan  sa amihanang kalungsoran nga maoy nasugamak sa dakong kadaut sa bagyong Yolanda.

Hinuon   ang  ubang  supply sa isda sa kamerkadohan dinhi sa Sugbo gikan usab sa  Mindanao gawas sa Palawan, Iloilo  ug Masbate nga lakip usab sa naigo sa bagyong Yolanda. Si Dr. Poquita miingon nga kini ang hinungdan nga si  Director Bojos ug mga kaubang kawani sa ilang buhatan   nagpadayon pa  sa  pagsusi  aron  masuta  ang katibuk-ang   kadaut  sa panginabuhian  sa  mga  molupyo  sa amihanan.

Gawas  niini  maningkamot  usab  sila  nga   katabangan sa ilang buhatan ang mga mananagat nga mahibalik ang naandan nilang panginabuhi. (/WC)(BANAT NEWS)