Love triangle gituohang motibo sa pagpamusil

CEBU, Philippines - Love triangle ang gituohang motibo  sa pagpusil angol sa usa ka welder didto sa barangay Tuble sa lungsod sa Moalboal sa miaging alas 3:00 sa kaadlawon.

Ang naangol naila nga si Jose Marvin Cabunilas, 33, welder, kasamtangan nga nagpuyo sa barangay Tuble apan gikataho nga lumad kini nga taga Negros. Ang suspetsado naila lang sa ngalan nga Parz, 26, chainsaw operator, lumad nga taga Ronda.

Samtang ang uyab sa biktima naila nga usa ka Jen-Jen Gabales, 19, molupyo ra usab sa barangay Tuble .

Matud pa sa Chief Investigator sa Moalboal Police  Station ug ni Assistant Chief of Police nga si SPO3 Brendo Joel Beriaromenti nga nahinabi sa Banat News, nga love triangle ang ilang gisunod  nga  motibo.

Base sa imbistigasyon nasuta nga sa sayo  pa, ang suspetsado ug si Gabales nagkuyog padulong sa usa ka welding shop nga giabotan ni Cabunilas.

Matud pa ni SPO3 Beriaromenti nga ang biktima nahinanok na sa pagkatulog, apan nanuktok sa shop  si Parz ug si Gabales sa pultahan sa shop busa  giablihan  ni Cabunilas. Sumala pa ni SPO3 Beriaromenti nga tuyo lang unta nga makig-estorya kang Gabales ug ni Parz ang biktima.

Apan gipusil ni Parz ang biktima sa unom ka higayon.

Naigo ang  biktima  sa iyang tuong tiil ug dali usab nga misibat ang suspetsado sakay sa iyang motorsiklo.

Miingon si Beriaromenti nga sa iyang pag-imbistigar kang Gabales kinsa kasamtangang natanggong sa Moalboal Police Station nagdumili kini sa pagtug-an sa ngalan sa suspetsado. Sumala pa ni Beriaromenti nga kung buot pa sa suspetsado nga patyon ang biktima iya kining mabuhat sanglit duol ra man  sila sa usa’g-usa.

Miingon  si  Beriaromenti nga ang suspetsado kanhi hinigugma ni Gabales ug ang biktima maoy kasamtangan nga hinigugma ni Gabales. (/WC)(BANAT NEWS)