Cebu City mohatag og p12 milyones sa Tacloban

CEBU, Philippines - Ang dakbayan sa Sugbo mohatag og P12 milyones nga tabang-salapi alang sa mga biktima sa bagyong Yolanda sa dakbayan sa Tacloban, Leyte.

Si Mayor Michael Rama miingon nga wala siya’y pagsupak sa sugyot sa Cebu City Council nga mohatag ang dakbayan sa mao nga kantidad ug anha ibanon sa Calamity Budget sa siyudad.

Matud ni Rama nga iyang gidayeg ang mga konsehal sa ilang lakang nga pagpakabana sa ubang local government units (LGU) nga nanginahanglan og tabang kay naigo sila sa katalagman.

Kaliboan ka mga tawo ang nangamatay didto sa Tacloban dihang ang ilang panimalay gibanlas sa tubig-dagat nga gidala sa grabe kakusog nga hangin tungod sa Yolanda.

Sa laing bahin, gipasusi na ni Mayor Rama ang mga lungsod sa amihanang Sugbo aron masuta nila kun unsay dugang panginahanglan sa ilang mga lumulopyo nga nabiktima sa bagyong Yolanda.

Si Raquel Arce nga maoy market administrator sa dakbayan maoy gisugo ni Rama nga moadto personal sa mga lungsod sa Bantayan Islands ug Camotes Islands.

Matud ni Arce nga dili siya mobalik sa dakbayan kun dili niya matuman ang gisugo kaniya sa mayor. Mibiya si Arce kagahapon sa hapon alang sa iyang biyahe sa Bantayan Islands ug dayon isunod niya ang isla sa Camotes.

Gisugyot sayo pa nga ang mga 10 ka lungsod sa amihanang Sugbo nga nahiagum sa kabangis sa bagyo’ng Yolanda hatagan sa dakbayan og P5 milyones kon tag-tunga sa milyon matag lungsod. (/EIM) (BANAT NEWS)