Popular nga Malapascua Island usa sa nagusbat kang Yolanda

CEBU, Philippines - Grabeng kadaut ang nahiaguman sa isla sa Malapascua sa amihanang bahin sa lalawigan sa Sugbo human sa bagyong Yolanda.

Kini base sa paghulagway sa pipila ka mga dive shops ug resort operators kinsa nakasaksi sa hitabo atol sa bagyo kung giunsa pagguba sa bagyo ang isla nga naila kaayo nga bisitahan sa mga langyaw’ng turista tibuok kalibutan.

“Basta basag jud ang isla, patas ang tanan, wala’y gipili mga balay hurot gi pang tanggalan og mga atop,” matud pang Sonia de Dios sa Blue Corals Resort.

Si De Dios nitabok gikan sa isla niadtong Sabado paingon sa dakbayan sa Sugbo aron makahinabi sa tag-iya nga atua sa gawas sa nasud sanglit walay kuryente ug komunikasyon ang isla apil na ang tibuok amihanang bahin sa lalawigan sa Sugbo.

Matud pa niya nga gagmay’ng sakayan pangdagat ang nipalabang sa mga pasahero gikan sa isla gumikan sa pagkaguba sa mga dagkung pasaheroan nga sakyanan sa kadagatan.

“Grabe jud sobrang luoy pero at least wala’y nangadisgrasya, safe ra ang tanan mga balay, hapay jud sa tibuok Malapascua,” matud pang de Dios sa iyang mensahe sa Facebook.

Samtang pipila ka grupo ang naghimo og Help Malapascua page sa Facebook diin ilang gibutang ang mga hulagway ug mga kasayuran sa isla ug ilang panawagan alang sa tabang sa isla.

Usa ka headquarter sa Help Malapascua ang anaa gipahimutang sa 35-B Amon Court, sa Salinas Drive, Lahug, dakbayan sa Sugbo isip usab hatdanan sa mga hinabang. (/EIM) (BANAT NEWS)