Mga eskuylahan sa Mandaue andam na sa klase karon

CEBU, Philippines - Andam na  ang  mga  tulunghaang  publiko   sa dakbayan  sa Mandaue  alang  sa  klase  sa  mga  tinun-an  karong  adlawa.

Kini  ang gibutyag  sa  principal  sa  Mandaue  City  Central  School  nga  si Aliena Quimque  sa  mga  tigbalita.

Iyang  gipangunahan  ang  mga  magtutudlo  sa maong  dakbayan  sa pagsusi  unang daan  sa matag  lawak  saringan  kun  takud ug angay kining  magamit sa  ipahiluna  nga  klase.

Kini  tungod  kay  kasagaran  sa  mga  eskuylahan  sa maong  dakbayan  gigamit  nga  bakwitanan  sa  mga  molupyo  sa milabay’ng  semana  agi  og  pangandam  sa bagyo  nga  Yolanda.

Gisuta  sa mga magtutudlo  kun  hinlo  ba  ang  ilang  mga  lawak  klasehanan  ug  wala  na bay  mga miukopar  nga  bakwit  niini.

Nasayran  nga mikabat  sa 150  ka  pamilya  sa barangay  Looc  ug  nadugangan  pa  kini sa mga namakwit  nga  gikan  sa   barangay Centro, Mantuyong, Cambaro ug Paknaan.

Ang City Disaster Risk Reduction and  Management  Council (CDRRMC) sa maong  dakbayan  nakatala  og  kapin sa 2,500  ka pamilya  nga  miukopar  sa 53  ka  mga class room  sa City Central School.

Hinuon  miingon  si  Quimque  nga wala  kini  pabiyai  sa  ilang  mga  maestro  nga  maoy  mibantay  sa maong  mga  lawak  sa pagsiguro  nga  walay  mga gamit nila  nga  mawala. (Romeo T. Limpangog/WC)

Drug addict  nagbitay patay

Patay ang usa ka 22  anyos nga lalaki nga  naghigot og pisi  sa liog sulod sa lawak nga ilang gipuy-an sa sitio Matumbo sa barangay Pusok, dakbayan sa Lapulapu alas 2:00 pasado  niadtong Domingo sa hapon. Si PO2 Winston Ybanez sa homicide section sa kapolisan sa maong dakbayan miila sa namatay nga mao si Ralfh Lester Igot, ulitawo,  nga  may kapuyo, ug nagpuyo sa maong dapit.

Matud pa ni PO2 Ybanez nga si Nita Punay nga kapuyo sa namatay mitug-an nga nangayo pa kini og kuwarta kaniya sayo sa buntag sa maong adlaw kay gustong mokuyog sa mga barkada nga adik-adik.

Dugang pa sa kapuyo nga wala niya kini  hatagi og kuwarta tungod sa kabalaka nga madala kini sa mga barkada, apan  gikasuko  niini nga  misangko sa ilang lalis.

Nagkainit ang maong panaglalis nga nakaaghat usab  kang Nita sa pagbiya sa ilang  balay ug mipaingon kini sa balay sa igsoong babaye sa namatay  nga ila  ra  usab  nga  silingan.

Nahibilin  nga nag-inusara ang namatay ug sa pagbalik pa sa kapuyo maoy nakita niini nga nagbitay na kini sa sulod sa lawak sa ilang balay.

Nangayo  siya  og   panabang sa ilang mga silingan nga  maoy  mitangtang  sa pisi  nga  nylon  nga  gigaid  sa sagbayan  sa balay  ug  sa  liog  sa namatay.

Gikarga  dayon  kini sa ambulansiya sa mga sakop sa Emergency Rescue Unit Foundation (ERUF) ug gidala ngadto sa Lapulapu City Hospital apan gideklarar kini sa mga doktor sa maong tambalanan nga dead on arrival. (/WC) (BANAT NEWS)