Duna pay mga dapit nga wa mabalik ang suplay sa tubig
CEBU, Philippines - Nabalik na sa Metropolitan Cebu Water District ang 71 porsiyento o 143,000 cubic meters nga tubig sa ilang franchise areas.
Matud pa sa MCWD advisory nga gipadala sa Banat News nga pagka alas 4:30 sa hapon kagahapon, ang 12 ka pumping wells sa Talamban wellfields nabalik na human naayo na sa Visayan Electric Company ang poste nga naguba sa maong dapit.
Ang Talamban wellfields, maoy nagsuplay sa Talamban, Banilad ug Kalunasan sa Cebu City ug ubang barangay sa Mandaue City.
Apan matud pa sa tigpamaba sa MCWD, Charmaine Rodriguez-Kara, molanat pa og upat ka oras hingpit nga mabalik ang normal nga pressure sa tubig.
"It would take mga four hours pa to build up the pressure," matud pa ni Kara.
Midungag si Kara nga wala sila’y hunong sa pagtrabaho aron mahibalik ang supply sa tubig nga 200,000 cubic meters.
Ang MCWD nag-agad sa gipaspason sa VECO nga mabalik ang supply sa kuryente sa mga lugar diin mahimutang ang pumping stations sa MCWD. (BANAT NEWS)
- Latest
