Mga poste ug wires sa VECO nangaputol tungod ni Yolanda

CEBU, Philippines - Human gikuso-kuso ang Sugbo ni super typhoon "Yolanda", niresulta kini  sa pag- blackout sa tibuok franchise sa Visayan Electric Company Inc.  sugod alas-10 sa buntag kagahapon.

"Sa pagkakaron, blackout gyud ang tibuok franchise area sa VECO," matud pa ni Theresa Gonzales-Sederiosa, ang corporate communication manager sa VECO nga nahinabi sa Banat News kagahapon sa hapon. Ang franchise area sa VECO gilangkuban kini sa Cebu City padung sa San Fernando (South) ug gikan sa Cebu City padung sa Liloan (Norte).

Matud pa ni Sederiosa ilaha pang gi-assess kung unsa gyud kadak-a ang damage nga nahimo sa ilahang mga ekipo, poste, transformers ug uban pa.

Dugang pa niya nga daghan silang mga poste ang nangatumba ug ingon man daghan silang mga transformers nga nibuto.

Nagkanayon si Sederiosa nga maglisod sila pagsulti kung kanus-a mobalik pagsiga ang tibuok franchise area tungod kay ang mga linya sa kuryente sa ilahang mga suppliers, nangaguba usab.

"As of now, we do not know pa gyud, kanus-a ni musiga ang suga but rest assured to all our customers that we are working 24 hours and we are doing our best nga madali ang pag-restore sa power," dungag pa ni Sederiosa. Apan kagahapon sa alas-5 sa hapon nabalik na ang kuryente sa pipila ka mga feeders sama sa Ermita, Calamba, Carreta feeders apan 12 megawatts pa lang kini. (/EIM) (BANAT NEWS)