Usa patay, 2 missing ug liboan mibakwit

CEBU, Philippines - Usa ang patay samtang duha ang missing sa super typhoon Yolanda nga miigo sa nasud kagahapong adlawa nga nagdala og kapin sa 200 kilometro kada oras nga huros sa hangin. Samtang liboan ka pamilya ang namakwit padung sa mga evacuation centers sa nagkadaiyang dapit sa Central Visayas kagahapon.

Matud pa nga patay ang usa ka babaye sa lungsod sa Medellin nga gikatahong nadat-ogan og lubi apan atol ning pagbalita ang kapolisan padayon pa sa pag-ila sa maong babaye tungod kay naputol ang komunikasyon sa kapolisan didto sa maong lungsod.

Mokabat usab sa 110,000 ka mga tawo o 35 mil ka pamilya ang midangop sa mga evacuation centers sa tibook rehiyon.

Si Supt. Renato Dugan, Chief Public Information Officer sa Police Regional Office 7 miingon nga sa dakbayan sa Sugbo kapin sa 15 mil ka mga tawo ang mibakwit.

Sa lalawigan sa Sugbo kapin sa 12 mil, samtang kapin sa 9 mil sa Negros Oriental ug kapin sa usa ka libo sa Siquijor.

Samtang ang Bohol nga bag-o lang giigo sa linog kapin sa 30 mil ka mga tawo ang kasamtangang midangop sa mga evacuation centers.  Ang maong mga tawo anaa karon sa 710 ka mga evacuation centers lukop sa rehiyon. Sa laing bahin, usa sa mga na-missing naila nga si Capt. Celito Baluntang, taga dakbayan sa San Carlos sa lalawigan sa Negros Occidental ug maoy kapitan sa tugboat nga gipanag-iya sa Cebu Asiatic Shipping and Port Inc.

Kini nidunggo sa Pier 3 sulod sa Tsuneishi Heavy Industries sa barangay Buanoy sa lungsod Balamban, mokanaog na unta kini sa tugboat  apan tungod sa kakusog sa bawod ug sa hangin aksidente kining natagak sa damyo padung sa dagat ug wala na igkita pa.

Samtang missing usab ang usa ka Manolito Casipong,30, nga giingong nakainom ug milugsong sa sapa sa Mananga sa siyudad sa Talisay ug nagpaanod.

Si Casipong nga taga San Isidro Talisay giingong nakit-an sa silingang si Archival Abella nga milangoy sa maong sapa nga misaka na ang tubig tungod sa bagyo. Sumala pa ni Kapitan Boy Pelonio sa barangay Lawaan II nga nakit-an usab niya si Casipong diha sa tubig nga nagwara-wara pa sa botelya sa mineral water ug wala na maabti pa sa grupo nila ni Konsehal Danny Caballero ug Vincie Monterde, hepe sa City Risk Reduction and Management. Samtang usa ka bata usab ang giingong naangol sa barangay Jaclupan tungod sa natumba nga kahoy ug laing usa nga si Rosita Rigodon,49, taga barangay Lagtang ang natumbahan usab og kaymito.

Sa barangay Manipis usab dunay mga pamilyang nanago ilawom sa imburnal human nga ang ilang mga balay nangaguba tungod sa hangin. Hinuon napahiluna sila sa mga mirespondeng polis pinangolahan ni Supt. Resty Santos. Sa barangay Tabunok usa ka mabdos ang nagbati diha sa evacuation center sa ilang sports complex ug gidala sa tambalanan.

Ang facebook account  sa Department of Science and Technology miingon nga makaunom ka higayon nga nag “landfall” si Yolanda ug una niini alas 4:10 ang takna sa kaadlawon kagahapon sa Guiuan, Eastern Samar ; pagka-alas 7 sa buntag sa Dulag-Tolosa, Leyte; ikatulong higayon mitugpa kini sa lungsod sa Daanbantayan alas 9:40 sa buntag ug ang ikaupat sa alas 10:40 sa buntag sa isla sa Bantayan Island.

Alas-12 ang takna sa udto mitugpa kini sa Concepcion, Iloilo sa ikalimang higayon. Ug alas-8 kagabii, ang ikaunom ug kataposang kayutaan nga iyang naigo mao ang Busuanga, Palawan ug gipaabot nga molahos na kini padung sa West Philippine Sea ngadto na sa China. (/EIM) (BANAT NEWS)