200 ka pamilya sa Naga mibakwit nang daan sa gym
CEBU, Philippines - Dili mominus sa 200 ka pamilya gikan sa kabaybayonan sa syudad sa Naga ang namakwit na sa mga gymnasiums sukad sa milabay’ng gabii.
Matud pa ni Garry Cabotaje, ang tigpamaba sa maong syudad, 150 aning mga pamilyaha gikan sa Ati tribe sa barangay South Poblacion, usa ka coastal area.
Matud pa ni Cabotaje sukad sa milabay’ng adlaw gipaablihan na ni Mayor Val Chiong ang gymnasium, covered badminton court ug mga tunghaan alang sa mga pamilyang angayang ibakwit para mahilayo sa disgrasya.
Ang maong lakang sa mayor gibuhat aron malikay ang katawhan hilabi na kadtong duol sa baybayon, naa sa mga bukid o bahaon nga mga lugar sa mga posibleng mahitabo nga dili maayo hilabi na nga gidudahang grabe ang kadaut ni Bagyong Yolanda kung moigo na kini sa nasud.
Ang ubang mga pamilya naggikan sa Barangay Tinaan ug Central Poblacion nga naa na sukad pa sa Miyerkules sa gabii diha sa covered badminton court sa syudad.
Dugang pa ni Cabotaje ang mga evacuation centers aduna nay mga tubig, pagkaon ug mga medical team nga moatiman sa mga evacuees.
Si Chiong, sa laing bahin, misuspenso sa trabaho gahapon (half day) ug karong adlawa. (BANAT NEWS)
- Latest
