42 Ka lugar maagian ni Yolanda

CEBU, Philippines - Giisa na ang public storm warning signals sa 42 ka mga lugar nga maigo sa super typhoon "Yolanda"  sumala pa sa Philippine Atmospheric Geophysical and Astronomical Service Administration (PAGASA).

Ang Eastern Samar, Samar, Leyte, Southern Leyte, Siargao Island, ug Dinagat Island gibutang na sa signal no. 3 sa ilang alas-11 sa buntag nga weather update kagahapon. Giingong makasinati ang maong mga lugar og 101-185 kilometro kada oras nga haguros sa hangin.

Samtang gibutang na sa signal no. 2 ang Sorsogon, Masbate, Ticao Island, Northern Samar, Biliran Province, Bantayan Island, Camotes Islands, Northern Cebu, Cebu City, Bohol, Surigao Del Norte, Camiguin, Surigao Del Sur, ug Agusan Del Norte.

Ang Camarines Norte, Camarines Sur, Catanduanes, Albay, Occidental Mindoro, Oriental Mindoro, Burias Island, Romblon, Marinduque, Calamian Group of Islands, Southern Quezon, Aklan, Capiz, Iloilo, Antique, Guimaras, Negros Occidental, Negros Oriental, Rest of Cebu, Siquijor, Misamis Oriental, and Agusan del Sur gibutang na usab sa signal no. 1.

Ang mga lugar nga naa sa signal no. 2  gipaabot nga makasinati og 61 ngadto sa 100 kph nga huros sa hangin sud sa 24-oras ug ang nabutang sa signal no. 1 makasinati og 30 ngadto sa 60 kph nga huros sa hangin sud sa 36 ka oras.

 Eastern Samar landfall

Sumala pa sa PAGASA, si Yolanda nasigpatan 637 kms sa silangang bahin sa Hinatuan, Surigao Del Sur  kagahapon sa alas-10 sa buntag.

Ang Yolanda duna gihapoy gikusgon nga maximum sustained winds 215 kph duol sa tunga  ug 250 kph ang haguros niini samtang nag-irog padung sa kasadpan sa gipaspason nga 30 kph, Yolanda. Gibanabanang motugpa kini sa Guiuan, Eastern Samar alas- 9 ngadto sa alas- 10 sa buntag karong adlawa  Nobiyembre 8.

Lakip sa posibleng maagian ni Yolanda human maigo ang Guiuan mao ang mga probinsya sa Leyte, Biliran, Northern Cebu, Iloilo, Capiz, Aklan, Romblon, Semirara Island, Southern Mindoro , Busuanga  ug mogawas padung sa West Philippine Sea sa Sabado sa buntag.

Subay sa forecast sa US Navy Joint Typhoon Warning Center (JTWC) kagahapon sa alas-onse sa buntag,  ang Yolanda magdala og 135 knots (250.02 kph) nga haguros sa hangin sa dayon niini og tugpa alas- 8 sa buntag sa kayutaan sa Pilipinas. (BANAT NEWS)