‘Force evacuation’ ipatuman sa Lapulapu City kung magmagahi ang mga tawo

CEBU, Philippines - Hayan ipatuman sa Lapulapu City ang " force evacuation "sa mga residenteng magmagahi sa paghiklin sa mas luwas nga lugar nunot niining nagsingabot nga giingong usa ka super typhoon nga Yolanda.

Atol sa presscon kagahapon sa buntag si Radaza , mipahimangno sa mga residente niini nga anaa daplin sa kadagatan sa paghikling una sugod ugmang adlawa aron malikay sa maong katalagman.

Matud pa ni Mayor Radaza ang mga sakop sa kapolisan maoy moimplementar sa force evacuation sa mga residente nga magmagahi sa pagbiya sa ilang pinuy-anan.

Gitinguha sa kagamhanang lokal sa dakbayan sa Lapulapu nga "zero casualties" ang mahitabo kung mahinayon gyud ang bagyong Yolanda.

Giandam na usab sa mga sakop sa DepEd Lapulapu ang tanang tunghaan ug ang mga covered court alang sa mga mohikling gikan sa mga costal barangays.

Nanghinaot si Radaza nga mangandam daan ug mokooperar ang mga residente sa dakbayan sa Lapulapu ilabi na sa mga gamit sa emerhensiya isip pagpangandam sa umaabot nga bagyo. Lakip sa iandam sa mga  kinahanglang andamon mao ang mga flashlights, kandila, tubig, makaon alang sa pipila ka adlaw.

Andam na usab ang mga kahimanan ug ekipo sa dakbayan sa Lapulapu alang sa mga emergency response sa mga danyos mugna sa bagyo. (BANAT NEWS)