BOC collection milamwas sa iyang target sa Oktubre
CEBU, Philippines - Luyo sa nagpuli-puli nga mga opisyal nga midumala sa Bureau of Customs (BOC) sa Port of Cebu sa milabay’ng bulan nakakuha gihapon kini sa ilang collection target sa bulan sa Oktubre ning tuiga.
Matud pa ni OIC Cebu District Collector Atty. Paul Alcazaren nga nagbunga ang iyang pahimangno sa iyang mga sakop nga dili magpaapekto sa sitwasyon sa adwana pinaagi niining nagkalain-laing nagdumala nga gitudlo ni BOC Commissioner Ruzzano Rufino “Rufino†Biazon.
Sa bulan sa Oktubre nakakuha og P867 milyones ang BOC Cebu labaw kay sa gi-target unta niini nga P754.582 milyones.
Sa aktuwal nga collection mikabat sa P113 milyones o 15 porsiyento ang lamwas niini kay sa orihinal nila nga kolektahunon.
Matud pa ni Collector Alcazaren nga dako ang buhis nga nabayad sa Toledo Power hinungdan nga milamwas ang ilang target collection sa buwan sa Oktubre.
Sayo niini mitumaw ang tensiyon sa buhatan sa BOC Cebu sa milabay’ng bulan human gi-question ni Atty. Ma. Lourdes Mangaoang ang pagkatudlo ni Atty. Alcazaren isip OIC District Collector sa Port of Cebu kinsa ubos og posisyon kay kaniya.
Si Atty. Mangaoang wala makalingkod isip OIC District Collector sa Port of Cebu gumikan sa 7.2 magnitude nga linog nga miigo sa Sugbo.
Busa napupos ang tagal ug gibasura sa korte ang Temporary Restraining Order nga gipasaka niya , uban sa 16 ka mga district collectors gumikan sa ilang pagsupak sa ilang bag-ong katungdanan sa Department of Finance isip mga sakop sa Customs Policy and Research Office o CPRO. (BANAT NEWS)
- Latest
