PRO-7, OCD miawhag sa publiko nga mangandam sa bagyo nga Yolanda

CEBU, Philippines - Nanawagan ang kadagkoan sa Police Regional Office 7 ug sa Office of Civil Defense nga mangandam ang katawhan sa umaabot nga gituohang mamahimong super typhoon nga Yolanda.

Matud sa Regional Director sa PRO7 Chief Supt. Danilo Constantino nga mo-isyu siya og direktiba sa kapolisan nga mangandam alang sa maong bagyo. “As early as today bago mag-landfall mag-aadvise na tayo sa mga unit commander’s natin to prepare,” sumala pa ni Constantino.

Miingon si Constantino nga iyang ipasusi ang mga kahimanan niini sa search and rescue ug mag-conduct siya og inventory kun pipila ka mga personnel ang may training sa search and rescue operations.

Lakip sa kamandoan unya nga luwatan ni Constantino nga kinahanglang dunay koordinasyon ang kapolisan ug ang mga Local Government Unit para sa posibling pag-activate sa Local Disaster Risk Reduction Management Council.

Samtang pahiklinon lang una ang mga residente nga naa magpuyo sa mga accident prone areas sa mas luwas nga mga lugar. Ang administration officer sa Office of Civil Defense 7 nga si Flor Gaviola sa iyang bahin miingon nga kinahanglang magmatngon ang publiko panahon nga dunay umaabot nga bagyo.

Gitinguha sa OCD ang ‘zero casualties’ sa pagsud hangtud sa pagbiya sa maong bagyo. Gipahinumdoman usab ang katawhan nga kinahanglang nakahibalo na silang daan kung asa ang evacuation centers sa ilang barangay ug kung asa ang alternatibo nilang evacuation center kung magkagrabe ang sitwasyon.

Samtang gimando ni Mayor Michael Rama ang pag-andam sa mga heavy equipment sa dakbayan aron makaresponde dayon karong Biyernes.

Ang maong bagyo giingong  nagdala og kusog kaayo nga hangin nga ang gikusgon sobra sa 200 kilometros matag oras.

Dihang miigo ang kusog kaayo nga bagyong Ame ug Ruping dinhi sa Sugbo taud-taud na nga katuigan ang nakalabay nagbilin kini og dakung kadaut sa mga tanom ug kabtangan.

Ang Super Typhoon Yolanda gihulagway nga mas kusog pa kay sa bagyong Ame ug Ruping mao nga ang katawhan giawhag nga mangandam daan sama sa pagkaon, flashlights, mga sinina, tubig ug uban pa. (BANAT NEWS)