Ordinansa labot sa covered court wa pirmahe ni Rama

CEBU, Philippines - Wala pirmahi ni Mayor Michael Rama ang ordinansa nga gipasar sa Cebu City Council nga nagtugot sa kahugpongan sa mga lumulopyo sa Barangay Punta Princesa nga sila ang makadumala sa sports complex sa ilang sitio.

Matud ni Mayor Rama nga dakung binuang ang maong ordinansa ug maisip nga illegal mao nga wala niya kini pirmahi.

Ang balaud nga gilatid sa Local Government Code (LGC) nagtugot sa mga mayor ug gobernador nga maka-veto kon dili pagpirma sa mga ordinansa ug resolusyon nga wala nila magustohi. Apan ang Republic Act 7160 naglatid usab nga ang pag-veto sa mga local chief executive  (LCE) mahimong mawad-an og gahum kun ang two-third sa mga konsehal mohukom nga ilang i-override ang pag-veto sa mayor. Kay ang konseho sa dakbayan duna may 18 ka sakop ug 14 man ang alyado sa Bando Osmeña Pundok-Kauswagan (BOPK), nagpasabot nga sayon ra kaayo nila ma-override ang veto ni Mayor Rama.

Ang konseho mipasar og ordinansa nga ang inaptan nga basketball court sa Sitio Manggahan, Punta Princesa ipadumala kini  sa mga opisyal sa Punta Princesa Manggahan Homeowners’ Association.

Matud ni Rama nga binuang og illegal nga ang butang sa kagamhanan ipadumala sa usa ka sibilyan nga kahugpongan.  Si Kapitan Jose Navarro sa Barangay Punta Princesa mihulga nga mopasaka siya’g kaso batok sa mga konsehal nga mihatag og pagtugot nga ang basketball court sa Sitio Manggahan madumala sa pribadong mga tawo.  (BANAT NEWS)