Rama gusto mopapanumpa sa mga midaog nga brgy. Kapitan

CEBU, Philippines - Ikalipay ni Mayor Michael Rama kun adto kaniya manumpa sa ilang katungdanan ang mga bag-ong napili nga mga opisyal sa barangay nga midaug atol sa Barangay Election kaniadtong miaging Lunes. Gusto gani ni Mayor Rama nga karong semanaha na ang oath-taking ceremonies ipahigayon apan dili siya mamugos kun ang mga midaug nga kandidato dili gusto nga siya ang mopapanumpa kanila. Dihang nahimo’ng mayor si Rama kaniadtong 2010, iyang gipapanumpa og dungan ang mga opisyal sa barangay didto sa City Hall ug gani kadto maoy nakabuak sa maayo nila nga relasyon  ni Rama ug kanhi Kongresista Tomas Osmeña.

Ang mga opisyal sa barangay kaniadto nga gihulagway nga kontra sa Bando Osmeña Pundok-Kauswagan (BOPK) gipahural ni Rama sa sunod-sunod nga kalihukan sa City Hall ug wala imbitaha ang mga kauban niya sa BOPK aron makatambong.

Nangangkon na si Rama nga mas daghan siya og mga kaalyado nga opisyal sa kabarangayan sa dakbayan nga midaug sa miaging barangay eleksyon.

Dunay nanglantaw nga daku kaayo ang posibilidad nga ang mapili nga presidente sa Association of Barangay Councils (ABC) alyado g’yud sa Team Rama.

Atol sa press conference kagahapon, ang mayor miingon nga dili pa siya makatug-an kun kinsa ang iyang mahuna-hunaan nga ituboy alang sa pagka presidente sa ABC.

Ang mahimong presidente sa ABC makalingkud isip ex-officio member sa konseho nga magrepresentar sa mga opisyal sa barangay. –/WC (BANAT NEWS)