Calamity loan application padayong gidawat

CEBU, Philippines - Padayon nga manawat og  loan application  ang  mga ahensya sa gobyerno alang sa mga empleyadong pribado ug publiko  nga apektado sa linog.

Sa report sa Philippine Information Agency (PIA-7) sa probinsya sa Sugbo, gipahibalo nga tulo ka mga ahensya karon sa gobyerno ang puwede nga maduolan sa mga nasugamak sa 7.2 nga linog sa  duha na ka semana nga milabay.

Ang  maong  loan  magamit  sa pagpaayo sa mga nangaguba nga balay o kaha  ikabayad  sa medisina  ug  sa hospital  sa  mga biktima  nga  nahospital.

Ang mga pribadong empleyado makapahimus gihapon sa “calamity loan” gikan sa Pag-ibig Fund nga nagkantidad og 80 porsiyento sa ilang natipon nga pundo  sa maong ahensya.

Samtang kadtong adunay mga housing loans sa Cebu  ug Bohol, mahimo usab nga mo-apply og “moratorium” o hunongon lang una ang pagbayad sa tulo ka buwan.

Gikinahanglan lang nga moadto sa opisina sa Pag-ibig ang maong miyembro  ug mo-apply og moratorium sa sulod sa 90 ka adlaw gikan sa kalamidad.

Sa laing bahin ang Social Security System (SSS) mipauswag sa deadline sa application sa ilang Special Salary Loan Terms sa mga miyembro gikan sa Nobiyembre 29 ngadto na sa buwan sa Abril sa sunod tuig.

Mahimong maka-loan pinaagi sa Special Salary Loan Term ang miyembro ug ang mga pensyonado mahimo usab nga makakuha og  balor tulo ka buwan nga pension. Sa mga nagtrabaho sa gobyerno, ang Government Service Insurance System o GSIS, nagpahibawo nga kutob na lang karong Nobiyembre 24  ning tuiga  ang deadline sa pagpahimus  sa maong  gitanyag  nga  calamity loan.

Ang usa ka empleyado mahimong makautang og gikan sa P20,000 ngadto sa P40,000.

Gituyo kining pagpadako sa kantidad aron kadtong mga adunay daan na nga loan sa miaging bagyo, aduna pay makuha.

Nasayran nga ang mga loan nga mapahimuslan gikan sa mga ahensya sa goberno aduna lamay ubos nga interes itandi  sa mga pribadong lending institution. (/WC) (BANAT NEWS)